2013 墾丁‧台南‧高雄自駕之旅 (5) 24.3.2013

2013 墾丁‧台南‧高雄自駕之旅

 

Day 2 24.3.2013 星期日

 

伯利恆 ® 龍磐草原(龍磐公園) ® 風吹沙 ® 茶山吊橋 ® 佳落水 ® 九棚 ® 港仔大沙漠 ® 牡丹大橋 ® 石門古戰場 ® 四重溪 ® 恆春古城 (東門、南門、西門、北門) ® 出火特別景觀區 ® 小杜包子 ® 關山日落 ® 出火特別景觀區 ® 墾丁夜市 ® 伯利恆

 

 睇完我哋就繼續向北行，到咗滿州鄉，附近有一條吊橋叫茶山吊橋，要行呢一條橋就要俾十蚊雞清潔費，查實咪即係上橋費，唔知點解叫清潔費。雖然係十蚊雞，但係我哋無行到條橋，因為覺得無咩特別 !

咁之後我哋就去附近嘅另外一個大景點，佳落水~~~開頭重以為係唔洗俾錢入場嘅添，原來係要收 NT$70 入場費，另外架車就要收 NT$50 嘅停車費。諗咗一排都係入去睇下有咩睇啦~~~如果無車入去佢哋好似有車會載你入去到個景點到 ! 原來由閘口入去到景點個位都幾遠下個喎，入到去，要泊低架車，再坐佢哋嘅車入去睇景點。我哋去到個時，都有唔少人係到等緊，重見到有一班香港人係到。沿途個司機會當導遊講下D石似咩嘢，D石真係要有D想像力先諗到係D咩形象嘅嘢，重有就係見到有好多人係到釣魚，呢到沿海嘅位置，應該有唔少嘅魚可以釣~~~睇完影完相見都差不多12點啦，就係呢個位置到食個Lunch啦，係停車場個到有幾間食店，主打又係食海鮮，查實係我哋口渴想搵下有無嘢飲，之後先諗起差不多要食Lunch~~~我哋見到佢哋擺晒D海膽出來，就問下有無海膽炒飯食啦 ! 因為有一次係南澳到食過一個海膽炒飯食，真係幾好食架 ! 問第一間話無喎，我哋就諗只係像隻海膽放落去一齊炒啫有幾難呢 ?! 因為佢哋本身都有炒飯呢個餸啦嗎，之後問第二間又無喎，到最後一間一問就話有啦，呢D先識得做生意架嗎 ! 咁我哋就叫咗個海膽炒飯食，一個炭燒蠔、一個炒菜~~之後諗諗下D海膽都係 NT$100 ，圍返港幣三十蚊都唔洗喎，咁就叫咗一隻生食啦。問返個伙計，佢話呢一期得紫海膽，要遲D先有馬糞海膽食，我就食過馬糞海膽，味道都幾好，紫嘅就未食過 ! 個伙計將隻紫海膽開咗，然後係我哋面前放返上碟到。紫海膽，味道好似無咁海水味，又無咁 Creamy ，不過都幾好食。我哋食嘅時候，隻紫海膽個殼都重係到郁緊~~而個紫海膽炒飯就真係好一般，佢哋炒唔到個種味道，唔夠南澳個到整得咁好食 ! 個炭燒蠔都幾好食~~

行吊橋要收清潔費

佳樂水

沿路好多奇形怪狀嘅石，要用D幻想力先諗到係咩

入來睇石要座呢架車

Lunch嘅地方

炭燒蠔

海膽刺生

炒野菜

海膽炒飯