2013 墾丁‧台南‧高雄自駕之旅 (12) 26.3.2013

2013 墾丁‧台南‧高雄自駕之旅

 

Day 4 26.3.2013 星期二

 

伯利恆 ® 高雄 ® 旗津 ® 風車公園 ® 旗津旗後炮台 ® 旗津高雄燈塔 ® Lunch@旗津 ® 星空隧道 ® 85大樓 ® 大遠百 ® 高雄誠品書店 ® 太平洋SOGO ® 捷運美麗島站光之穹頂 ® 六合夜市 ® 85大樓水格印象

食完之後我哋就去睇呢個星空隧道，呢個星空隧道其實都係係旗後砲台附近~~去到呢個隧道，日頭睇真係無咩特別，可能真係要夜晚睇先會靚D，因為隧道入面D嘢都無發光嘅~~影下相我哋就走人啦~~因為約咗85大樓住宿個到嘅人1500係大樓樓下到等~~

我哋由旗津出返去高雄應該係好快，但係個GPS唔知點解呢，係高雄市中心係成日都收唔到衛星訊號~~

先前係Google 到搵咗個停車場嘅位置，入咗去個GPS 位置，最後我哋都搵個個停車場，不過去到個時已經1515，咁我就要去85大樓個到同個人講聲要泊咗車先可以Checkin。

去到85大樓到個個人已經係到等緊，咁我就同佢講聲要泊好架車先，係85大樓到住有幾個停車場可以選擇，一個係地下室內停車場(NT$200/day)，一個係露天嘅(NT$250/day)

“三多路/近自強路(廟對面/在三多路上)亞太財經地下停車場收費200元/24小時”

呢個停車場可以自出自入，NT$200真係幾抵~~不過呢個停車場D位都幾窄下，要泊幾次先安心D，因為攞車個日驗得非常仔細，我諗整花少少佢哋都可能會Claim返錢都唔定，所以就要小心D。

係呢個停車場泊車，要泊係個D寫住”收費位置”個D位先得，因為有D位係呢個大廈嘅租客或者住客自己嘅位。泊完車就要去呢個停車場個辦事處，其實得張枱，同佢哋講係85大樓嘅住客就可以享有NT$200/24h，無限出入嘅優惠，呢一次我哋要泊4日，所以就要俾NT$800喇~~

泊好車，就捚埋行李去，呢個停車場係B2，要搭Lift去返1字，然後有個牌會指住85大樓係行咩方向。好啦，搵返租 房個 小姐，然後一齊去攞房。我哋今次就搵咗一間叫85水格印象嘅租房，其實呢個85大樓有好多間租房嘅，呢間只係其中一間。

本來搵到D幾特色架，不過問多兩問，佢哋就租咗俾其他人，台灣租房住好多都要你去入個訂金去銀行先。呢到都唔例外，不過我哋就無入到，因為同佢傾到我哋出發前一日先Confirm，銀行都收咗工~~~

今次住個間房其實無咩特別，好似一般酒店房咁，我哋住5日4夜，盛惠HK$1,600~~呢間房重會每日都會有清潔，所以想係房到Hae下都唔得~~

安頓咗D嘢，然後我哋就去附近嘅位置都行下啦。呢個85大樓附近都有唔少嘢，有大遠百、SOGO重有個興中夜市~~一落樓就有7-11 都幾方便。

第一站就去睇下呢個大遠百，查實咪係一幢百貨公司。係行去呢個大遠百個時，途經一間食店寫住炭火燒肉，後尾搵資料發覺原來係遂鹿炭火燒肉，呢一間嘢都幾出名架，收費每人NT$495，有海鮮、有肉同埋蔬菜可以燒，重有Haagen-Dazs 雪糕任食，真係幾正，咁我哋就諗住遲一兩日先食。不過我哋見到入面都有唔少人係到，重有D人係到等位添呀~~

繼續去到呢個大遠百睇嘢，地庫有得食嘢同埋無印良品，係呢到嘅11/F重有個Food Court。不過上面有全台灣最高嘅誠品書店係到(17/F)，呢間誠品其實都幾大，我哋行咗一陣無收穫就走咗。

睇完我哋就去太平洋SOGO到睇下，係個地庫都有個Food Court，之後個D樓層都無睇到。係SOGO隔離就係三越，我哋都無睇到~~

因為我哋要去行呢個六合夜市，去到呢六合夜市，我哋就搭捷運去到美麗島站到去個六合夜市，順便睇埋呢個美麗島站光之穹頂。我哋係三多商圈站搭兩個站就到呢個美麗島站，一出去就會見到呢個光之穹頂，以一個車站來講呢一個都幾特別同埋都幾靚。

睇完我哋就去掃街，就係去呢個六合夜市啦，呢個六合夜市都幾多嘢睇，嘢食都唔少，不過就有好多旅行團係到。我哋開頭以為呢個六合夜市好大嘅添，原來好快就行完，咁短~~我哋就揀D嘢食啦，食咗個擔仔麵、無骨雞腳、鳥蛋蝦、排骨麵同埋一配蜜糖白苦瓜~~~行行下重落咗一陣雨添呀~~我哋行到8點幾就走人喇~~返去休息~~

呢個85大樓入面D電壓唔知係唔係有D問題，用風筒吹頭非常之苦惱，可能係得110V問題，個風筒又唔熱又細風~~~

呢D螢光嘅嘢要夜晚先會睇到

旗津街道..

有個天后廟

旗津碼頭

85大樓水格印象

85大樓外觀

大遠百

大遠百B/F

高雄誠品

光之穹頂

六合夜市