2013 墾丁‧台南‧高雄自駕之旅 (17) 29.3.2013

2013 墾丁‧台南‧高雄自駕之旅

 

Day 7 29.3.2013 星期五

 

85大樓水格印象® 蓮池潭 ® 打狗英國領事館官邸 ® Lunch@爭鮮 ® 新堀江商圈 ® 原宿玉竹商圈 ® 漢神巨蛋 ® Dinner@興中夜市 ® 大遠百 ® 85大樓水格印象

 

今日個早餐都係係7-11到食飯團加呢個大肉包，食完我哋就去我哋第一個景點啦~~今日去高雄市入面D景點睇下，個GPS繼續係Short Short哋，所以我一早就睇咗行咩路去，萬一個GPS Short咗都可以揸車去到~~

今日我哋第一個景點就係去呢個蓮池潭，去呢個蓮池潭其實都幾快，開頭諗住無咩睇好快睇完，所以會去埋另外一個叫澄清湖，不過估唔到呢個蓮池潭都幾多嘢睇。去到呢到首先當然係搵位泊車先啦，開頭泊咗係另外一邊，不過遠得滯就揸近D去到個龍虎塔附近就有得停。停咗架車就行入去，去到個龍虎塔啱啱係到裝修緊無得入去睇添~~係出面到影下相就算，係呢個塔出面有個蓮花池，不過D蓮花就榭晒~~我哋就繼續行啦，再行前又有個龍塔，呢個位望返去個龍虎塔到都幾靚，如果係龍友應該會影好多相。繼續行就去呢個關公個邊，不過行行下有人拗親隻腳，咁啱個相機又無電喎。最敝就係呢到有個蓮花池D蓮花都幾靚架嗎，好在有電話係到，可能用手機影住先啫~~

之後我哋就去呢個打狗英國領事館官邸，個GPS又繼續Short Short哋，帶咗我哋去咗唔知邊到，好在最後兜兜下又去到啫。入去呢個官邸係要俾入場費NT$30嘅，入面其實好細，不過都幾靚下~~呢個位睇日落又係幾正，唔怪得之早幾日來到嘅時候有咁多人係呢個啦~~睇完就揸車返去呢個停車場啦，因為下午我哋會搭捷運去睇嘢，係返去個時就順便入埋油先，因為聽日還車個時要滿缸還車嘅~~Total入咗成NT$1,490，又唔係好貴喎，加埋之前入咗 NT$1,135，總數都係大約用咗HK$700油錢到~~


是日早餐

蓮池潭

附近有間叫高雄物產館..買下D高雄出產嘅嘢

蓮池潭龍虎塔

呢個蓮池無咩蓮花睇

呢個蓮花池多好多蓮花

打狗英國領事館官邸

打狗英國領事館官邸

呢到都幾英式下

連個門都係英國旗

入下油先