2010 土耳其自駕之旅 (50) Day 7 - kaklik magarasi

27/10/2010 Day 7



Pamukkale > kaklik magarasi > mugla > marmaris

Pamukkale : kaklik magarasi

lunch@mugla

Grand cettia hotel @marmaris

kaklik magarasi

kaklik magarasi

今日其實係無咩行程嘅，原先諗住落去Datac 同Knidos ，去呢兩個地方有咩做??就係睇日出日落同埋睇沙灘，但係車程就非常之遠，如果要由Pamukkale去Datac的話要成5個幾鐘! 呢個係未計算俾GPS小姐老點個喎，而今晚嘅住宿就會係Marmaris到，由Datac出返去Marmaris要個幾鐘，所以我哋就決定唔去啦…

睇本旅遊書講係Pamukkale附近有個叫Kaklik嘅地方，係2000年時係Denizli嘅東面30km嘅Kaklik發現咗呢個洞窟，據說係因為1999年時土耳其發生咗2次大地震之後先震出個洞口，個洞窟入面有石灰湧泉同埋石灰棚，所以有”棉堡第二”嘅稱譽，但係家下只係開放咗一部份俾人參觀~~~

睇完上網搵過下資料，我哋就去呢個”棉堡第二”到睇下啦~~~係個GPS到入咗個位置之後就出發，不過個GPS今日又再發揮佢嘅老點本色，帶我哋行埋D唔知咩地方嘅路，我哋去到Kaklik就周圍問下當地人呢個景點嘅位置，佢哋就指我哋行~~去到個個景點附近就見到個啡色牌指住個景點嘅方向(係土耳其，所有嘅景點都會有一個啡色嘅指示牌指住個景點個方向)，入到去行條路，完全唔覺得係去緊一個旅遊景點，附近好似一個工業村咁樣，重要有石屎工廠係附近~~~我哋真係無行錯路嗎?呢個疑問又再次出現係我哋個口到啦….好在行行下再有個牌指住，跟住我哋就見到有個停車場停咗一架車係到，但係附近就咩嘢都無，就只有兩間荒廢咗嘅屋係到。

架車到有個人座咗係到，原來係個售票員，我哋一落車佢就行埋來，我哋就問佢呢到係咪 Kaklik
Magarasi喇，佢答係，入場費盛惠每人TL$2。之後佢就指住一個方向，叫我哋行落去，個個就係Kaklik Magarasi，我哋一行埋去就有好大陣嘅熱氣加埋一D硫磺味湧向我哋。行埋D去睇，有條生晒鏽嘅鐵梯俾人行落去，再望入D入面有個好靚嘅藍色湖仔~~~好似係四川黃龍個一種藍喎，真係幾靚~~~於是我哋就行落去喇，呢個景點其實唔係好大，2分鐘就可以行完，但係入面真係幾靚個喎。落完條梯，我哋就行入去睇啦，入面真係有一個好似棉花堡咁樣嘅石灰棚喎，不過當然規模無咁大啦，不過就係細細哋反而覺得幾靚，重要係無人踩過所以保存得幾好~~~我哋係入面影咗好耐相先出返來~~睇完我哋就去幫襯下呢到個廁所啦，有隻狗狗跟住我哋行來行來喎，唔知係唔係想問我哋攞嘢食呢?但係我哋無嘢食喎~~~係行去個廁所途中，見到有一個泳池，好大個下，不過入面就無水嘅!!我哋懷疑佢哋係會將個D溫泉水引過來呢個池到，然後俾人浸，不過呢個位置嘅景觀咁樣同埋附近又咁多工廠喎，有無人浸都成問題~~~不過其實呢個景點真係幾值得來睇嘅，不過如果唔係自駕的話，我見有網上面有人係包車來睇個囉..
我哋就係跟住呢個牌去搵架啦.. 

係上面望落去無咩特別

再行多兩步睇就唔同啦..

好清晰嘅藍色

就係沿住呢條路行入去啦..

不停咁有D泉水流入去架..

入面有石灰棚

睇落去都幾靚

呢到都幾似棉花堡

呢個位重似棉花堡

唔知講咩，應該係介紹呢個景點

係附近有一個位置不停咁湧D泉水出來