2011 塔斯曼尼亞自駕之旅 (23)(Day 16 10/11/2011)

Batman Fawkner Inn > Cataract Gorge > Lunch@Food Hall > Batman Fawkner Inn > Tamar Island > Country Club Tasmania Casino > Launceston Airport > Melbourne > Hong Kong

 今日一早起身見到藍天真係好開心呢，因為可以去埋係 Launceston 嘅 Cataract Gorge 啦，攪下呢樣攪下個樣，都要成9:30先至出發，今朝早餐就係食晒所有剩餘嘅嘅忙，早餐係牛角包夾雞蛋同熱狗腸再加千島醬，食完嘢就Hae咗一陣就離開呢間住宿喇～～

我哋今日嘅景點係Launceston  嘅 Cataract Gorge ，呢一個話係一個公園，但係其實有都幾大下～～以我哋泊車個位唔係經常係網上面D人去到泊個個停車場，我哋泊咗係一個細嘅停車場到，而網上面D人講個個就係大個個停車場～～係個公園入面有幾條路徑可以揀來行，最短個條要行成30分鐘～～我哋見有時間就行咗條 ZigZag Track 、 Cataract Walk 同埋睇埋 King's Bridge 同 Alexandra Suspension Bridge。

原來其實要睇條 King's Bridge 係可以就咁行 Cataract Walk 就得，唔洗行 ZigZag Track 架，因為 ZigZag Track 係山路來嘅，重要有樓梯上上落落，會比較難行D，不過慢慢行就唔覺點辛苦～～一路行條ZigZag Track個時都見到有好多本地人係到行山又跑步，好似唔洗返工呀 !? 呢到D生活指數咁高，咁佢哋D人工係咪好高嘅呢 ? 一路行D風景其實都幾靚，行下影下就唔覺唔覺行咗成兩個鐘。呢個公園入面重有好多孔雀係到周街行，有D重要不停咁開屏添呀～～

行完大約１２點，於是我哋又返去個Food Hall到食個Lunch先，但係今次就要泊架車係D錶位到啦，我哋入咗一個鐘錶。泊完食食下嘢先諗到，我哋唔洗入一個鐘先，因為佢係半個鐘為一個單位，可以入半個鐘先～～佢哋好怪，半個鐘就$1，一個鐘就要$3喎．．．可以入兩次半個鐘就有一個鐘啦嗎～～傻咗～～最後其實我哋唔洗半個鐘就食完走人添呀～～

今次我哋食泰式嘢，叫咗個喇沙同埋炒豬肉飯，都幾好味 !! 食完就去咗一個叫 Tamar Island 嘅Wetland行。呢到有D似香港嘅米埔濕地，有好多高過人嘅蘆葦，同埋都幾好行，全程都係行平路。又有D黑天鵝係到游來游去，我哋大約行咗一個鐘都見唔到其他人。行呢個 Wetland係唔洗收入場費，佢只係要你做 Donation 每人 $3 ，不過我哋就無俾喎～～因為之後上網睇返先知呢．．．

之後我哋因為到無咩地方去，就去咗個 Country Club 到Hae下，又入去個 Casino 到玩下啦，今次去到D Black Jack 都重未有得玩喎～～我呼又玩個 Roulette ，今次就贏咗 $20，開頭個個荷官D出現結果好容易估，後來轉咗第二個之後就好難估啦。玩到差不多15:30我哋就走人去機場，原來個機場都幾近下個喎，十幾分鐘車程就到喇～～呢到還車就咁泊低架車，俾返條鎖匙個職員就可以走人，然後就問下你有無入滿缸油同若果有問題就會Call我喎．．．吓～～走咗就口同鼻講啦．．

之後就機場到 Checkin 過程都非常之快喎，個機場有 Free Wifi 添呀～～今日要搭一程內陸機去 Melbourne，然後就係
Melbourne 轉機返香港，中間有成個幾鐘係機場到等～～去到
Melbourne 個 Terminal 2 搵 Checkin Counter ，去到一個職員都無，我哋見都成七點幾八點咪去搵嘢食囉，先前搭完內陸機經過一D食店再去睇下，最後我哋都係揀咗食 Subway，叫咗一隻長嘅包兩個人一齊食，係 Seafood 味嘅～～

食完就返去Checkin Counter 到等，見到有好多黃種人係到，應該都係同一班機去香港，好在見到有人放咗D行李係條 Checkin Counter line 到，我哋又放埋，如果唔係遲一步就要排好後啦～～

攪掂完行李我哋就係機場到行下，D嘢都唔平，因為香港買嘢其實真係好平呱～～試咗支羊油脂搽手，又幾潤喎，不過香港好似有得買。之後就過海關啦，唔知點解另外一位團友過關時要經過一次另外一個人Check先得，不過最後都係無問題～～有D時間就係Duty Free 入面行下啦，然後就等上機啦～～呢個15日嘅Tasmania之旅就結束啦～～


呢個旅程見到D景色最靚嘅就係個海灘，真係清到好似個泳池咁，食物就係青口，真係又嫩又滑又甜～～重要係唔黏牙，係香港真係幾難食到，D蠔又真係幾好食，但係唔會"嘩"好好食咁囉～～

重有就係消費指數好高，唔知係唔係因為澳元高嘅關係呢～～兩個人係街到求其食餐返埋單都要成百幾蚊港幣，買支嘢飲又要二十幾三十蚊，但係榆當地人又唔覺佢哋有D咩咁喎，可能係佢哋嘅人工都幾高下呱 !! D商店嘅辦公時候又超短，有D重要星期日都唔開添 ，如果係香港可能會執笠都似 !! 重有D人好似唔洗返工咁個喎，成日都見佢哋跑步（但係跑極都咁大件），行山同埋踩單車，重要係一家大細個喎，生活真係幾悠閒～D Casino 又有好多老人家係到玩老虎機，好似老人俱樂部咁，D人落注幾十蚊幾十蚊咁當係無咩嘢咁～～呢到食嘢好單調，好在最後係Launceston搵到個Food Hall咋，有D亞洲嘅美食，其實Hobart都可能有，係我哋無去搵啫～～

再講下D景點先，今次我哋基本上就去到西面個面，同埋部份中部嘅部份，西部景點唔係好多，鄰近重有個叫Lake St. Clair同埋 Strahan 市十西面搵想嘅資料就係話呢區主要係礦山多，中部睇其他D 人嘅Blog 講重靚過搖籃山喎～～

呢個旅程一開始係Hobart時都係大部份時間都係陰天同落雨，有小部份時間有陽光。離開Hobart之後就一路都好天啦，因為D戶外景點都幾多，所以有藍天就正好多啦～～最後入到去 Launceston 又開始天陰，又一日要差不多成日都落雨，個日我哋係Inn到都幾Hae 下～～最後一日臨走都好天，可以去埋Cataract Gorge ，正．．． 

整個旅程都幾Hae下，其實去旅行係唔應該趕景點，其實去旅行係咪應該要感受一下當地嘅生活習慣同不同嘅文化，同埋享受下外國嘅風景，唔應該去完旅行返來成個人都散晒嘅．．．

呢一次坐澳航又無得係網上面揀位，要揀就要俾$20澳幣，中間重發生咗工潮添，停航咗兩日，好在最後都無影響都我哋回程個航班，係回程個到有無得 online checkin喎，不過呢次 Qantas 係咁多間最平個一間，同埋時間係最好嘅～～我哋大約係 11/11/2011 06:00 就返到香港，等捚埋行李等咗半個鐘，返都屋企未夠八點鐘～～～

好嘢～～終於都完成咗呢個塔斯曼尼亞之旅啦，要半年後先完成～～家下手頭上重有個德國同埋差不多兩年前嘅土耳其．．．我要盡快完成晒佢~~