2016 九州自駕之旅 序 (2)

2016 九州自駕之旅

序

返咗來香港幾日，都重有放假Feel..呢次去咗18日。18日好似都幾長，但係其實玩晒成日九州好多地方都係走馬看花，有D景點重要無去。重有就係睇櫻花，開頭以為成程都會有好多櫻花睇，3月頭睇D櫻花情報基本上係覆蓋晒我哋成日行程。點知天氣不似預期，去嘅時候重係好凍，所以基本上得尾個幾日先有D櫻花睇下! 成個行程，最深刻嘅就係係櫻島睇睇下，火山突然爆發，個時都未有驚，重係到影下相，但係D日本人就即刻走入涼亭，睇多兩睇就即刻走人，我哋都係睇睇下先跟住走!個日返到酒店，再搵下資料，原來櫻島個火山係今年2月先噴過熔岩出來~~~其實呢個九州其實都幾多嘢睇，不過感覺同東北或者北海道有D唔同，好似比較鄉下D。但係就有勁多韓國人同埋強國人出現，一有佢哋出現嘅地方，我哋都係睇兩睇就走，因為佢哋真係幾噪同埋無咩禮貌，尤其係D韓國大媽，係大景點都見唔少香港人。

今次因為係臨出發前一個月先訂住宿(又係咁~~來緊嘅旅行都係快D決定先)，同埋有部份地方想住下D好少少嘅溫泉旅館，所以住宿費用會比較多咗，其餘嘅都係正常洗費，今次兩個人都買咗D衫褲，去D大型嘅Shopping Mall無咩嘢買到，但係去D細少少嘅反而多嘢買。行李個 Quota都未用得晒，返來我哋每人30kg，兩個加埋都係50kg(呢兩次日本返來嘅時候，都發覺佢哋會將行李放埋一齊磅，唔知係咪個個都係咁嘅呢?)。因為個天氣問題(呢段時間應該係著短袖衫，點知都重要著冬天衫)，所以要帶D冬天衫同埋夏天衫，去個時個喼都放到2/3滿~~~

下面呢個費用係主要開支，個人血併費用就無加到入去~~

機票	HKD 5,464.00
旅遊保險	HKD 466.00
住宿費用	HKD 18,389.90	¥275,743.00
泊車費用	HKD 166.73	¥2,500.00
入油費用 (行咗 2113.7km)	HKD 689.66	¥10,341.00
租車費用	HKD 5,513.44	¥82,670.00
食用費用	HKD 7,423.64	¥111,312.00
入場費用	HKD 1,720.66	¥25,800.00
其他費用	HKD 1,598.92	¥23,974.00
紀念品費用	HKD 1,112.03	¥16,674.00
交通費用	HKD 13.34	¥200.00
總數	HKD 42,558.32	¥638,130.00

希望個遊記可以快D完成~~下一站可能會去歐遊，去北歐定係會去瑞士呢~~~