2016 九州自駕之旅 Day 5 24/3/2016 星期五 (9) 祝願．熊本縣 ~~~希望唔再地震~~~

2016 九州自駕之旅 Day 5 24/3/2016 星期五

長崎 >  雲仙地獄 (0957-73-3434; MC 173 556 382) > 仁田峠 (0957-73-3572; MC 173 589 614) > 俵石展望台 (MC: 173 471 814) > 島原城 (0957-62-4766; MC 173 749 250) > 島原乘汽車渡輪  > 熊本城 (096-352-5900; MC 29 489 329)．櫻之小路 > 東横INN熊本城通町筋(Tel. 096-325-1045) > 通町筋 > 上通．下通

https://goo.gl/maps/jxKLqN8xdnB2

今日我哋要好早出發，因為要搭船過大海，唔係去澳門，係由島原搭船去熊本。我哋今日4點差不多5點就要起身，要6點幾就出發，所以就食唔到呢個東横INN嘅免費早餐~~~咁點算呢?係日本只要搵到呢個便利店就會有早餐食，於是乎就去咗酒店附近嘅便利店到買嘢食，原先諗住買包食。便利店D蒸包其實幾好食架，不過原來佢哋唔係長蒸住D包，係朝早先放入去蒸~~~所以我哋只有食飯團，最後買咗兩件飯團做早餐，食完就出發~~

出發時大概6點鐘到，可能早嘅關係無咩車，揸得幾暢順。揸咗大概40分鐘到去到一間便利店到放低D嘢，見到佢哋有包買，我哋又買咗一件來食。呢一件係紅豆包，日本嘅紅豆真係無得輸~~~

食完又繼續行程，我哋7點幾就到咗雲仙地獄啦，無咩人~~我哋泊咗係一個停車場，不過無人係個收費亭入面，所以早來係免費嘅~~~一落車~~嘩~~好凍有好多蒸氣~~我哋即刻行去睇下呢個雲仙地獄喇。我哋都係行咗一半到，原先想行晒，因為團友話好凍，想快D走人~~~

睇完呢個我哋就去仁田峠喇，去到呢個仁田峠嘅，原來係8點前會封路唔俾上嘅~~~但係我哋見到有一架車移開個欄揸入去，應該係上面商店嘅人。距離8點重有成半個鐘，唔通係呢到等?定係移開個欄揸入去呢?但係上面條路有機會會結咗冰~~最後我哋就決定~~唔去睇啦~~~

途經一個叫俵石展望台就入去睇下啦，不過其實我哋入去都係去廁所架咋~~

好，跟住就要去島原個邊~~我哋book咗10:15個班快船去熊本，去到呢個島原個時8點多DD，如果我哋即刻去碼頭就可以搭08:25個一班快船去熊本(想知點樣可以預約，可以睇下呢個如何網上預約熊本至島原的汽車渡輪，由島原外港開去熊本港有兩間渡輪公司，一間是熊本フェリー株式会社，另一間是九商フェリー株式会社。熊本フェリー株式会社係快船，航程要30分鐘，而九商フェリー株式会社係慢船，航程要60分鐘)。於是我哋就去睇下呢個島原城，去到都係無人，個城應該都係未開，所以我哋都係影張相就走人~~~

諗住有機會會趕到08:25個班船，點知係D燈位停下停下，去到碼頭就啱啱08:25。啱啱送船尾，但係我哋揸架車入去個時又見到一個牌寫住 08:35~~~咦~~~一睇就諗返起，係喎~~重有慢船個喎~~~咁我哋就依照工作人員指示揸架車入去停低，然後去買飛~~~

搭呢一班船都好過要等到成個幾鐘啦…去到熊本都係09:35，個班快船都未開。架車就依照D工作人員指示駛咗入去個船倉，之後我哋就係架車到休息，其實樓上重有客倉，不過唔知我哋嘅飛可唔可以上去上面休息嘅呢?我都行咗上去睇下~~~船程一個鐘，一陣間就過咗，重諗住瞓下添~~~

上咗岸就去呢個熊本城，我哋大概10:20到咗熊本城~~泊好車就入去參觀，雖然係10點幾，但係已經有好多遊客係到，有韓國、強國最多，香港人都唔少~~~呢到有一棵櫻花樹都開得幾靚，上埋個城嘅天守閣參觀埋，個天守閣都幾多人，想影張相都幾難就位。之後我哋就去咗本丸御殿到參觀下，呢一個地方有得食午餐嘅，不過就要預約先可以有得食~~呢個殿唔知係唔係用來招呼來賓食嘢嘅呢?

睇完我哋就去返正門個邊搭Shuttle 去櫻の馬場城彩苑到行下個櫻の小路，呢到其實可以由熊本城行過去都得，不過我哋一出去就有架Shuttle，梗係搭啦~~~

呢個櫻の小路入面主要係食店同埋手信店，我哋12點幾到，順便睇下有咩食。行行下見到有一間食放題，都係¥1500一個人，D嘢食都OK，於是我哋就食呢一間啦~~~

食完我哋就係呢到行下買下嘢~~~之後就行返上去攞車，見到有一棵櫻花樹開得幾靚有影下相。

跟住我哋就去是日住宿東横INN熊本城通町筋到Check in喇，Check in 完就做步兵周圍行下，呢個熊本嘅通町筋都幾多嘢睇，呢到重有幾多商場行下都幾正，重係一間買行山用品嘅店舖，又有減價貨，啱晒我，買咗風褸~~~行行下見到有一間買蔬果嘅店舖都幾多人排隊買嘢，門口又放咗D士多啤梨係到，都幾靚同幾香(其實我好似淨係見到外地嘅人先會聞下盒士多啤梨，D日本人好少有咁做~~~唔知你又有無聞下D士多啤梨嘅呢?)。係條下通入面嘅，見到有兩間寿司店都係24小時營業嘅，重有間一蘭係附近，就食一蘭拉麵啦~~~其實係D橫街到都重有好多食店，見得最多就係炭燒地雞店。入到去唔洗等位，要係自助買票機到買飛，買完就入去坐低。又要揀食D咩嘢，不過團友個一份揀錯咗唔要叉燒，變咗一碗淨麵，瀨咗嘢~~~話時話都唔知點解會有唔要叉燒嘅呢選擇俾人揀，但係我哋係另外一個地方嘅地道拉麵店食拉麵時，又真係有日本人食淨麵個喎…

日本一蘭嘅拉麵味道都唔錯，同香港嘅都差不多，不過就平過香港。我哋食完嘅時候，又有幾個香港人入咗來食。

之後就返去酒店休息，經過個間蔬果店我哋又買咗一盒士多啤梨返酒店食~~聽日就係長車程，因為要落鹿兒島。

係打緊呢一篇油雞嘅時間，日本九州嘅熊本係14/4/2016同埋16/4/2016發生咗七級地震，希望之後唔好震啦。因為有好多地方都已經受到破壞啦~~~

住:

東横INN熊本城通町筋

860-0844 熊本県熊本市中央区水道町1-1 096-325-1045

¥6053禁煙エコノミーダブル Parking: ¥500

便利店買嘅飯團

啱啱天光我哋就出發啦...

日出

便利店買嘅蒸包

雲仙地獄

仁田峠早到呢到都未開~~

途經一個展望所

好天應該會望到個海

島原城

又係未開，不過無咩人又幾正，停車又唔洗俾錢

排隊入去搭船

連人帶車就停係到搭船過海

島原港

客倉

熊本港

熊本城

好彩都有D櫻花開咗

秘密隧道

天守閣望返落去

周圍都係人

唔知係呢一刻(17/4/2016)嘅熊本城係點呢?

本丸御膳

櫻の小路

是日Lunch係放題

見到都幾多人食呢一個

周圍嘅廁所都見到呢一個提示

東横INN熊本城通町筋，今次間房細D..喼要放上床到

重有幾個Shopping Centre

美味嘅士多啤梨

香港759都有得買嘅洗頭水，佢有係寫住日本消量No.1，但係我哋又唔係周圍見到佢有得買喎..

 激安~~呢一間唔係24小時嘅

貓貓

一蘭拉麵

士多啤梨