2016 九州自駕之旅 Day 1 20/3/2016 星期日 (3) 金翅中伏鳥

Day 1 20/3/2016 星期日

香港 > 福岡空港 > 福岡空港第一ターミナル前店 (TEL：092‒623‒8694) > 鏡山展望台(睇虹之松原)( MC: 182 347 253/0955-72-9111) > AEON唐津市購物中心(イオン唐津ショッピングセンター) (MC: 182 376 053/ TEL:0955-70-6200) > 曳山展示場(MC: 182 401 736/ TEL0955-73-4361> 唐津ロイヤルホテル(Tel. 0955-72-0111)

今日係早機0755，所以就要5點幾就要出發去機場，出發前係屋企都食咗D嘢 ! 去到機場就去Check in ，然後就去等上機，今日機場都幾多人，應該係因為假期嘅開始呱~~~

班機準時出發，係飛機到睇下韓劇乳酪陷阱，話咁快過咗3個鐘到咗福岡，12:00落機~~~過海關好多人，要成差不多半個鍾先攪掂! 12:30就去攞行李，因為我哋係搭國際航線，而我哋Book嘅車就係國內線附近，所以我哋就要搭機場嘅Shuttle Bus 返去國內線。由我落車行去租車公司個到其實都要成10分鐘，推住行李都幾唔方便 !

今次我哋又係幫襯 http://www.tabirai.net/car/ 租車，而租車公司又係 Orix 。又係租返 Honda Fit Hybrid ，去到又係幫襯買埋個全保，租18日加埋保障就¥93,000到。不過呢一間嘅職員Check車個時都幾認真，我見佢咁認真，我就每一個花嘅位都影返張相，有少少疑似花嘅位都指一指~~所以都攪咗幾耐下，安置好D Car Cam 同埋播歌，可以出得發到已經係 13:40 啦~~~原先諗住去Marinoa City或者漁師村到食Lunch，不過入去個GPS之後最近嘅Marinoa City都要成個鍾。咁就搵車嘅 GPS 搵間寿司店食個Lunch，點知去到就執咗笠~~~~咁我哋就唯有邊行邊搵，最後我哋就揀咗便利店買包食~~~

去到我哋今日嘅第一個景點鏡山展望台已經係16:30喇，因為先前來嘅時間都幾塞車下。之後就去 AEON 到入下貨，最主要係買水，見到有士多啤梨重要有白色嘅就買咗一盒紅色加一粒白色(買一粒係因為驚中伏)。買完嘢就順路去埋呢個曳山展示場，點知去到佢哋就閂咗門~~因為我哋成17:30先到

咁我哋就去酒店Check in 啦~~~呢一晚我哋就住唐津ロイヤルホテル，係一泊二食嘅~~~上房放好咗行李我哋就落來食晚餐，呢一餐最主要係食魷魚刺生~~都幾好食個喎，佢哋嘅魷魚其實係有三食嘅，刺生、天婦羅同埋燒，我哋覺得個天婦羅都唔錯~~~

之後就上房食我哋買嘅飯後甜品士多啤梨，我哋聽人講白色嘅會好甜好好味，所以我哋就食咗紅色個盒先。日本嘅士多啤梨真係有士多啤梨味，不過就唔係想像中咁甜，重未擊倒塔斯曼尼亞嘅士多啤梨地位。我哋都非常期待呢個Moment，首先聞下有無濃郁嘅士多啤梨味先，係淡淡嘅士多啤梨味就聞到。我哋認為應該係咁嘅，無濃郁嘅士多啤梨味唔代表唔好食嘅~~~但係我其實覺得有少少中伏嘅感覺，因為買得一粒，所以我哋就切開一半食，切開都係無咩士多啤梨味。好啦，最緊張嘅時間到喇，放落口一咬，心中即刻有一隻雀湧上來~~~~金翅中伏鳥~~~呢一粒白色嘅士多啤梨，無咩士多啤梨味，無咩甜味~~~我哋懷疑係未熟嘅士多啤梨，所以就白色~~~

之後就休息一陣就去浸下溫泉~~~

路線圖

https://goo.gl/maps/buLSt9GYwfS2

住:

唐津ロイヤルホテル

〒847-0017 唐津市東唐津4-9-20虹の松原西口

0955-72-0111

¥25300
和室10畳（喫煙/4階）

天未光就出發啦

準備上機喇

福岡機場攞行李

搭穿梭巴士去國內線航廈

九州之旅出發啦

第一景點

超市買咗D士多啤梨

白色士多啤梨，其實係咪未熟嘅士多啤梨來嘅呢?

第二景點

是日住宿

是日晚餐

墨魚刺生

其實佢哋係重識郁架...

燒墨魚

墨魚天婦羅

呢個飯其實係食唔落架

溫泉

中伏了的白色士多啤梨