2014 冰島自駕之旅 Day 9 3/11/2014 (星期一)(11)

2014 冰島自駕之旅 Day 9 3/11/2014 (星期一)

Myvatn > Godafoss上帝瀑布 > Akureyri > Varmahlíð (Hestasport Cottage) 

今日我哋就會離開米湖，所以今日就會早半個鐘食早餐啦。尋晚醒咗個陣又影張出面嘅相睇下有無極光，最後都係無，朝早都有出去影又係無~~~係呢個米湖睇唔到有極光添 !!

兩日係米湖都睇唔到極光

早餐時間

今朝真係得我哋兩個人食早餐，但係份量同尋日一樣都幾正~~~食飽咗我哋就出發離開米湖啦，我哋第一個景點就係Godafoss上帝瀑布，由米湖去其實好快 !! 唔洗一個鐘我哋就去到，今朝天氣叫做幾好，所以我哋係呢到都影咗唔少相 !! 影完重入咗去附近嘅一間店舖到買嘢添，不過佢哋個網絡突然有問題，所以就唔可以用信用卡，無得用即係無得買啦~~~咁我哋就唯有唔買喇，咁又出去附近到再影下相，到返去攞車個時，個老闆行出來話個網絡攪返掂，又可以用信用卡結帳啦~~於是乎就係呢到買咗個磁石貼啦 !!

有雪嘅 Hverfjall偽火山 

條路應該積咗雪，不過今朝應該清咗

呢個係景點係.....叫Höfði，入面種咗好多樹架，不過無開到

Godafoss上帝瀑布

之後就無咩景點，我哋就要去冰島第二大城市 Akureyri 喇，揸咗大概一個鐘到就到咗 Akureyri 喇，我哋今次都係經過呢個Akureyri啫，因為呢到就無咩特別嘅景點 !! 我哋去咗個教堂到影咗張相，之後就去咗呢個大商場行下，不過無嘢買嘅~~~然後我哋就去粉紅豬到買今晚同埋聽朝嘅嘢食，之後就去N1油站到食Lunch，係市中心入面搵過兩間N1，但係又無熱狗食喎，所以我哋唯有去一入Akureyri個一間N1。今次我哋係用油咭俾錢，因為睇個樣有機會會用唔晒D油咭 !!

揸揸下落雪...

去到差不多 Akureyri 就無落雪啦...

Akureyri 地標

Akureyri 最大商場

今晚會食龍蝦

Lunch 食熱狗

食完Lunch，我哋就驅車去今晚嘅住宿，呢一間係一個Line友推荐嘅住宿 !! 係Varmahlíð嘅Hestasport Cottage，原先其實今日我哋係會住係Akureyri嘅，不過見Akureyri無咩睇，而且住宿又貴喎 !! 所以就揀住呢一間，同埋去後日個個地方又可以快D呀嗎 !!

我哋一點鐘左右出發，中途又落車影下相，途中又見到冰島馬，其實見個好多次，不過就無影過。見重有幾日就會走，就落車去影下佢哋啦。我哋大概三點鐘就到咗住宿個到 !! Checkin個到原來唔係住個到，住個到重要兜上去個山仔到 !! 今晚我哋會住係一間屋仔到，出面重有個Hotbath可以俾住客用添架 !!

天氣風雲變色中

行行下又去到有雪嘅地方

成段路都係雪，不過出面開始見到有藍天

成個山都白晒

終於有藍天出現啦...

冰島馬...

今日個GPS唔知點解要我哋行一條比較遠少少嘅路，不過我無理佢

好天嘅冰島，真係每一個地方都係影相位

呢到就係 Checkin嘅地方啦..

露天 hotbath

放好晒D嘢，我哋就出去附近嘅地方到行下睇下嘢，呢到有間超市，入面都幾多嘢買 !! 之後我哋就返去屋仔到準備今晚嘅晚餐，今晚我哋會有煮龍蝦食，D質感同係 Hofi 到食嘅差不多.......

今日好好天呀.....yeah

Supermarket...入面都幾多嘢買個喎...

有熟食買...

整龍蝦中

是日晚餐

食完又等影極光，今日好好天呀，係來到冰島最好天嘅一天之一呀，所以就唔可以錯失良機，我哋重出咗去出面個 Hotbath到浸咗半個鐘添呀，不過行出去個一嘢就好凍 !! 浸完就順便沖涼，之後就等影極光!!

中間有影下又去休息下，等到成一點半到，極光就出現啦，呢一個係成個旅程最靚嘅極光，不過大概出現咗半個鐘到咋。家下睇返D相，原來唔止有綠色，重有紅色架~~真係好靚，不過呢個極光就肉眼睇唔到，只係見到有D好似雲嘅嘢出現~~之後就去瞓咗兩個鐘又影過，都有極光，但係無啱啱個個咁精彩啦~~影到差不多朝早七點，真係無喇，就去瞓覺啦~~~