2012 捷克、奧地利、匈牙利自駕之旅 (8) - Day 5 Český Krumlov (CK) > Salzburg (Austria) 29 Oct 2012

Day 5 Český Krumlov (CK) > Salzburg ( Austria )
29 Oct 2012

今日就要離開捷克，進入奧地利玩5日，第一站就係去呢個 Salzburg ，由 CK 去 Salzburg 要差不多3個鐘。我哋係Apartment入面食返個自製早餐，差不多9點到就出發，其實想早D出發，不過就係驚落完雪D路難行，所以就遲DD先出發喇。揸車入境奧地利真係話都無咁易，我哋連入咗境都唔知，我只係見到D油站嘅價錢唔同咗先知道咋，係入咗境就要買返張Toll Sticker，如果唔係俾Yes Sir捉到就會罰錢~~不過一入到去 Salzburg唔知點解大塞車，淨係一段路仔就塞咗成半個鐘有多…

之後行行下就見到有個油站，先前聽D網友講話過境前或者過境後都有地方買D Toll Sticker嘅，我諗應該係就快過境個時應該有個油站有得買，不過我哋就 Miss 咗囉。咁見到當然就駛入去問下有無得買啦，有得買，盛惠EUR$8/10
Days，其實都叫做平啦~~

買完就繼續向我哋嘅目的地，Salzburg嘅住宿 Ante Portas ，我哋未夠11點就到咗呢間 Apartment，先前已經問過呢間 Apartment 可唔可以 Early Check-in，係無問題架~~呢一間 Apartment 都叫做容易搵，有Parking，我哋就將架車駛入去個停車場。之後就去 Check-in，呢一間 Apartment 嘅職員只會係 08:00~13:00 有人，但係呢~~佢哋個 Check-in 時間就係 14:00 個喎，真係有D奇怪~~

Check-in 過程都幾順利，我哋間房係頂樓，其實都係3樓啫，不過要攞件重行李上去都咪話唔重呀~~整好晒D嘢，之後就同佢哋買咗兩張 Salzburg Card (24
Hours)，呢一張咭包所有交通同埋部份入場費用，其實個部分入場嘅地方都包咗好大部份我哋想去嘅地方，所以都幾其抵~~個 Apartment 職員開頭就叫我買48 Hours，但係我諗諗下其實我哋24 Hours應該可以玩得晒，所以最後就買咗24 Hours喇。

呢張Salzburg Card買咗一用就要填上日期，即係你搭第一程交通工具個時就要填上去，而要入場費用嘅地方就咁去買飛嘅地方到，你一用佢入面嘅晶片就會入咗個日期。

好啦，我哋整好晒D嘢之後就出發去 Salzburg市中心食嘢先，由呢個Ante Portas去市中心，車程係15分鐘內就會到，我哋呢到淨係得4號車可以搭去市中心嘅啫，Ante Portas附近有一個巴士，1~2分鐘就到。我哋行出去，搵下巴士站，睇下資料咁啱就有架巴士駛埋站~~我哋即刻上車啦，其實基本上上咗巴士搵個位坐低就可以，因為我哋買咗張 Card 係無限任搭Salzburg市內公共交通工具嘅。

我哋沿途都見有人上落車，但係當地居民都係上車就搵個位坐低就算，完全係無買飛嘅，我諗佢哋應該都係有買月票呢家嘢，所以基本又係任搭~~話咁快就去到市中心，我哋係近米拉貝花園 (Mirabellgarden)個個站到落咗車，其實係可以下一個站先落車到得嘅~~我哋落車就朝住市中心方向行，首先會行過一條橋，然後就行到近格特萊德街 (Getreidegasse)附近，咁我哋就去睇下D景點順便搵食Lunch嘅地方先。呢到一去到就見到有間 Burger King，咁我哋就入去睇下D 餐咩價錢喇，唔~~5~60蚊港幣一個餐，都叫做合理呀~~

之後再搵下睇下有咩食啦，又見到有間食日本嘢個喎，行行下就見到一間幾出名食海鮮嘅連鎖店(之後都係Vienna到見到有) Nordsee ，咁我哋又入去睇下啦，呢間嘢都幾多人係入面，佢有包、有意粉同埋有海鮮類嘅冷盤可以叫，不過呢~~除咗D包之外，其餘嘅都幾貴，就講一碟蝦冷盤，佢哋就段kg計，一碟都要成二百幾三百蚊港幣，真係唔係幾抵喎，所以我哋睇完都無係呢架到食~~

再行就見到Café Mozart，呢一間呢~~就遲少少先食，跟住行行下去到莫扎特廣場，然後我哋就行返轉頭喇，咁我哋就決定食Burger King啦，行行下又見到有個廣告牌，係All you can eat，中式任食~~索價 EUR$9.9又唔係貴，因為食個Burger King餐都要成EUR$5~7一個人啦，咁我哋就去睇下啦。入到去我哋想睇下有咩食先，咁佢哋又肯喎，睇下個自助餐有咩食。其實種類就唔多，有幾樣餸重有炒麵、炒飯同埋D湯~~不過呢，我哋去睇呢個時間都淨低唔係好多餸係到，又唔知佢哋會唔會再補返D嘢喎。咁我哋見無嘢食咁就走人啦，去返 Burger King到食啦~~

自製早餐

出面都重係有落雪架

出發啦

一片白霧霧

係Salzburg嘅Apartment

Salzburg咭..正..

搭巴士

呢到都係用電車...都幾環保

呢條唔知咩橋

有馬車四圍載住D遊客周圍睇嘢

Nordsee..

D海鮮冷盤..不過都幾貴