~~~活在當夏~~~: 2012 捷克、奧地利、匈牙利自駕之旅 (10) - Day 6 Salzburg Schloss Hellbrun 30 Oct 2012

2012/11/24

2012 捷克、奧地利、匈牙利自駕之旅 (10) - Day 6 Salzburg Schloss Hellbrun 30 Oct 2012

Day 6 Salzburg 30 Oct 2012
Schloss Hellbrun - 惡作劇噴泉

今日嘅行程第一個站呢就係去海布倫宮Schloss Hellbrun，入面會參觀埋呢個惡作劇噴泉、真善美涼亭同埋月宮 (Month Palace)，所以我哋諗住9點去到Join個Tour，之後睇完就盡量用埋張咭睇埋D要俾入場費而張咭又包咗嘅景點喇~~

今朝我哋又係自製早餐，食完我哋就揸車去呢個海布倫宮，由Ante Portas去呢個海布宮大約15分鐘路程就可以到嘅，其實基本上我哋可以係市中心到搭25號車就可以去到。我哋未夠9點就揸車去到，先前係網上面搵資料D人又話可以免費泊車，呃人嘅~~要俾錢泊車嘅~~最後我哋係用咗EUR$2.6泊車嘅。去到個Ticket Office 到都未開，真係等到成9點先開，我哋去到個時都有一個家庭都係到等買飛~~呢個景點張咭又係包咗嘅~~但係第一個Tour竟然要係9:45先開始呀~~唔知係唔係因為唔係旺季嘅關係呢，所以就咁耐先有，但係第二個Tour係30分鐘之後就有啦~~距離個導覽重有成起碼40分鐘，咁我哋就去睇下其他地方啦，不過今日都係繼續好凍架，個人就真係唔係幾想郁~~首先我哋就睇咗個真善美涼亭先，呢一個亭係話係呢到拍仙樂飄飄處處聞嘅地點來個喎~~男女主角係個亭入面跳舞個喎~~不過家下呢個亭係唔會開放俾人行入去嘅…咁啱又遇到一家外國人，佢哋重主動問我哋洗唔洗幫我哋影孖支添，真好人，當然係好啦~~

之後我哋就行咗去出面個噴水池到影下相，然後又睇下個皇宮，不過無咩嘢睇~~見差不多我哋就去返個集合點到等個Guide Tour開始，都有幾個家庭。一入去就會見到個魚池，見到好多人都會影嘅一樣生物就係鯰魚，點解呢到會養鯰魚嘅呢?真係唔知，重要有條幾大條下添個喎~~

好~~第一站，惡作劇噴泉，亞導賞先生首先用德文介紹下呢個傑作嘅嘢，不過我哋唔識聽，之後就用英文簡單咁介紹下，然後就請人出去坐，睇過下D資料，呢個傑作係會整潔人嘅 !! 天氣又凍喎，如果唔係都會出去玩下嘅，呀~~但係居然有一個後生亞爸去試~~瞪瞪，亞導賞先生開機關~~哦~~全部位都噴出水，坐落去一定瀨嘢~~但係個個後生亞爸個位無事喎，原來係導賞先生無開到個機關啫，等佢行開咗開咗來俾我哋睇 ! 之後就一路帶我哋睇其他機關，呢個製作人真係幾攪鬼，設計咗一D嘢俾我欣賞，等你睇睇下然後就噴你水，真係可以話殺你一個措手不及~跟住重有好多用水做動力嘅設計品，真係幾有心思~~之後去到最後一間房睇個水力設計嘅嘢，咁我哋就最後先走啦，因為影下相呀嗎，點知一出來，俾個導賞先生噴水射我哋兩個…即刻濕咗…臨尾俾佢玩咗一嘢添…

自製早餐