2012 捷克、奧地利、匈牙利自駕之旅 (5) - Day 1 & 2

2012 捷克、奧地利、匈牙利自駕之旅 (5) - Day 1 & 2

Hong Kong > Dubai
> Prague > Karlovy Vary

 

通常去呢個歐洲都係係凌晨出發，今日我哋都係呀~~搭Emirate嘅 00:25 班機，去到迪拜(唔記得幾時轉咗名，舊時叫杜拜)。

今日出發都重要返工，所以放咗工就即刻返屋企準備出發，如果可以放埋假就更加好啦~~

平時就會搭Taxi轉機場巴士，因為小弟住係D山卡罅嘅地方，要轉下車先會到嘅。因為今日返咗工，所以就先前Call咗Taxi去機場。架Taxi開得都幾快，唔洗半個鐘就到咗機場。

去到機場就去寄行李，好在先前 Online Checkin咗，唔係就有排排隊。去歐洲真係要搭 Emirate，因為我哋兩個人D衫褲全部放入一個喼到，都幾重下，Emirate可以一個喼30kg都無問題，正~~~之前4月去巴爾幹半島搭德航，一件行李唔可以過 24kg ，都幾麻煩~~

 

攪下呢樣攪下個樣，原來都好快要上機~~呢一程係搭A380，D位舒服好多，因為好闊。我哋所有嘅飛機餐都揀咗海鮮餐(先前搭星航D海鮮餐好正架)，點知佢哋中東人嘅海鮮餐只係得三文魚，係由香港去迪拜個程有蝦同帶子，其餘個幾程包括返香港嘅兩程都係三文魚，問題係見到佢哋嘅常餐好似重正D添~~~所以下次坐Emirate都係唔食海鮮餐啦…

 

搭咗成9個鐘去到迪拜，要等成5個鐘先再轉機去捷克，搭Emirate如果等轉機時間多過4個鐘就可以有免費餐食，記得第一次食個時係有自助餐食，不過家下就派餐券，到指定餐廳換一個餐。先前唔知邊到換，周圍行，問個Help Desk就指住一個方向，原來個個位就係我哋落機入返去個機場個到附近，先前都見到有人係到排隊架啦，原來係換餐券食嘢。

 

換完餐券就去食嘢啦，其中一間係食泰國嘢嘅，諗住可能會幾好食啦，但係要行到好遠，同我哋轉機個位係一頭一尾…

而個泰國嘢食就~~唔~~又唔係唔好食嘅，係小料D囉。我哋係間泰國餐廳到叫咗個咖哩雞，D雞得一件加埋好少嘅菜同咖哩汁，重有就係叫咗個麥當當嘅餐。分而麥當當個餐幾好喎，又有新地送添~~食完嘢，我哋行返去轉機個位到都差不多要上機喇。呢一程要搭6個鐘，係機上面瞓咗一覺，好快就到咗捷克啦~~

 

去到捷克出境都幾順利幾快，攞行李就幾快。之後就去唱錢，因為我哋會直接去 Karlovy Vary ，所以就要唱定D錢，係機場到唱個 Rate 真係唔係好抵，重要收手續費，收咗成 CZK$300呀…後來發覺應該係禁 ATM 會責抵好多，如果真係一定要唱錢，大家可以係 ATM 到禁~~個 Rate 重要幾好添架…因為係機場到唱貴咗，所以D嘢對換返就貴咗好多啦…

 

之後就去攞車啦，係捷克租車，佢哋有一個停車場係專門俾租車公司用，就係 Parking C，就入境個一個大樓到要行出去，過對面個一棟 Parking 大樓，都幾容易搵(因為先前用Google街景搵過)。去到租車到就搵個租車Counter，今次我哋係搵到個間係 Budget ，呢一間其實係一間租車公司叫 EconomyCarRental嘅公司，佢其實應該係一間Agent，再搵其他租車公司租車，個價錢又平過租車公司個喎，不過就要落 Deposit 先囉 !!

 

去到Counter都有幾個人等緊攞車，不過攪D手續都好快就攪掂，但係無神神要俾 Deposit ，成 CZK$32,000，都成萬六蚊港幣，不過就Hold住咗筆錢，但係就無過數嘅。個職員攪掂晒D嘢就俾車匙我哋，叫我哋去邊到幾多號位攞架車~~~

 

去到攞車，今次俾咗架意大利出品嘅 FIAT 品牌，先前未揸過，呢一架車應該係一架好基本版嘅車，因為好多嘢都係好基本，連乘客位個兩個位都係無電窗嘅~~~我諗呢一架車應該得1,400c.c.到，因為真係無咩力，同埋去到高轉數先有力，咁就會好嘥油，同埋副Engine都幾噪下~~

 

不過架車都幾新淨，行咗兩萬幾公里到，上車個時都重有一陣新車嘅味道~~出發前就要 Set 好D GPS 同埋 Car Recorder 重有個 FM Transmitter ，呢一架車係無 Aux in ，所以就要用FM Transmitter喇。攪完一輪嘢，我哋都差不多成4點先由機場去 Karlovy Vary (KV) ，由布拉格去KV，要成2個鐘車程。可能呢幾次都係係歐洲自駕，所以呢好快就適應咗，不過架車就重未適應，因為無咩力。一開始個GPS好耐都幾Locate到我哋個Location，要等咗成十分鐘先得(之後好多次都係咁，唔知係唔係個GPS老化呢?定係凍得滯呢…)。一路行到無咩嘢，行行下有一段路好似封咗，我哋當然係博一博啦，去到個邊係成段block咗，點都係要兜路，又見到唔到路牌指去邊喎。開頭我哋行錯咗，又要行返轉頭，最後因為block咗段路要行多成40分鐘(個段路其實只係需要行5分鐘咋)。一路行都有微微咁落雪，我哋架車已經係裝咗雪軚，所以應該會用多D馬力，但係就安全好多(有次係日本東北到自駕，又係遇到大風雪，重要行山路，駕車行行下跣軚，好驚心動魄，好在無事咋，個到重要係山上面添呀)。

 

去到KV嘅住宿到差不多6點鐘，重要落緊雪。本來諗住攪掂Checkin好就會出去睇下D景點，但係來到KV都已經天黑啦。去到間住宿泊好車，望入去見到有個人，開頭以為係館主，後來發覺原來唔係，重同我哋講一大輪唔知咩話，哈~~有屋入有鎖匙入都屋就唔理啦，後來佢俾張紙我哋睇，原來館主話有要事，要去Pargue一趟，話呢個男人會俾資料我哋咁……

Checkin完都差不多成18:30，我哋重要去Supermarket到入貨，買D日用品。之後就出去搵食，本來諗住去市中心到兜下睇下有咩食啦，點之好多都係閂咗門。咁就試下用GPS入面嘅function search下啦，有McDonlad喎，跟住去搵下啦。不過McDonald就搵唔到，反而搵到間中國菜嘅餐廳，當然係入去睇下有咩啱啦。架車就咁放係門口，入面負責嘅人都可以講普通話~~掂，車可以放係門口無問題，我哋就叫咗個飯同湯麵，味道都唔錯呀~~~

食完就返去民宿到休息，點知個Wifi又用唔到，可以早D休息~~

出發啦...

呢個就係最好嘅一個海鮮餐..之後個D...

Emirate送嘅餐..

呢架就係陪伴我哋15日嘅車仔..

第一晚住宿 A.Dalia

第一晚食晚餐嘅地方

其實都幾好食..

住宿到幾民居下架

呢到就係食早餐嘅地方

我哋間房都幾大