2012 捷克、奧地利、匈牙利自駕之旅 (6) - Day 3 Karlovy Vary (KV) > Cesky Krumlov (CB) 27 Oct 2012

Day 3 Karlovy Vary (KV) > Cesky Krumlov (CB) 27
Oct 2012

今日起身望出去個窗出面係滿地都係雪，尋晚應該係落咗成晚雪。摸下個窗~~嘩~~好凍嘅呢~~

住宿呢到係包埋早餐，梳洗完就睇下上唔上到網啦，呀~~又得啦喎，可能係尋日我係張揀早餐張紙到寫咗上唔到網，個館主尋晚返到來就整過來啦~~

我哋就係8點食早餐嘅，未夠8點我哋就準備好啦，出到去就見到館主，傾咗幾句有問我Wifi用唔用到，之後就攞咗D資料登記同埋埋單~~我哋就問咗佢附近景點嘅資料同埋揸車去睇方唔方便呢，佢嘅答案同我搵嘅資料一樣，呢到泊車唔係好方便，有得泊車嘅地方有好遠，同係我哋係呢到行去景點差不多無咩分別，重有就係要俾埋Parking Fee 添啦~~又話我哋知點到有supermarket~~

傾完我哋就去食早餐喇，係傳統嘅歐洲早餐，麵包為主囉，重有D Ham …可以食得飽，無咩特別!!

食完我哋就執好行李，準備去市中心到行返一轉睇下嘢先，唔次個館主係咪以為我哋Check Out ，話唔可以放D行李係房到，叫我哋放返係車到或者放係食早餐個到喎 ! 我哋其實都無諗住咁快 Check Out 嘅，只係諗住出去行一轉之後就返來Hae一陣然後先至走人~~咁講法咁我哋唯有放D行李係食早餐個到先啦 !! 因為其實我哋都唔知會街幾耐嘅，可能會過咗個 Check Out 時間都唔定。食完嘢我哋就行落去市中心睇下D溫泉迴廊啦，由民宿個到行落去其實係唔洗10分鐘就會到咗景點，不過我哋出門口個時就落緊雪，由凍有滿地雪，要行慢少少，唔係就會隨時 PK 到似。

行到落去我哋睇第一個溫泉迴廊Vridelni Kolonada(Hot
Spring Colcnnade)，呢一迴廊入面有一個噴泉，都噴得幾高下個喎。我哋就係到影下相啦，同埋解下凍，因為出面好大風又凍添呀~~係呢個迴廊都幾多人係到，最大班嘅就應該係一班台灣人來嘅，佢哋係D精品店到買緊D Souvenir ，我哋都行埋去睇下啦，個都有D溫泉杯同埋D手指甲剉買。好多人都會買隻溫泉杯去載D溫泉飲下，不過D杯都唔平喎，細細哋一隻都要過百蚊，都幾貴~~如果係尋日來到有時間睇下的話，我哋都會考慮下買嘅，不過一陣間我哋就會去 Cesky Krumlov ，都要成2~3個鐘嘅車程，無謂博啦，一陣拉肚子咪大鑊 !! 唔知係唔係星期六嘅關係呢?! 成9點好多舖頭都未開，之後先發覺我哋無試到溫泉餅~~因為其實真係唔覺有邊到有得買，所以我哋無試到~~

之後我哋就去睇埋 Trzni
Kolonada(Market Colonnade) 同埋 Mlynska Kolonada(Mill Colonnade)，之後就決定走人啦，因為好鬼凍又落住雪咁~~行到返去民宿個到，去下廁所同埋掃走車上面嘅雪，都成差不多11點先出發~~

一開波個 GPS 又係好耐都未 Locate 到，應該係重未搵到D 衛星訊號，心諗你要生生性性呀，重有好多日要靠你架…等咗差不多5分鐘，好在有返訊號，可以出發啦。

本來原先諗住係去 Cesky Krumlov 之前會去下 Františkovy Lázně 同埋 Mariánské Lázně ，因為由 KV 去其實都幾近，不過今日天氣就唔係幾好，同埋去呢兩個地方有機會行山路去，所以最後我哋都係無去到呢兩個地方架，呢兩個地方其實都係睇下D溫泉嘅嘢。

由KV直接去 CK ，諗住途經 České Budějovice (CB) ，又係 Plan 咗入去睇下個廣場就走人，因為都係得個廣場同埋教堂，教堂我哋睇咗好多，所以都無諗住睇嘅，淨係諗住睇下個廣場算~~不過最後我哋都係直接去咗 CK 先，因為去到 CB 應該都成點幾兩點鐘。今日我哋就係車上面食零食做午餐，不過其實都唔係好肚餓，唔次係唔係朝早食得多嘢呢 ?!

行行下我哋見到有個好大嘅 Shopping Mall，於是我哋就停車入去睇下，順便入去方便下呀嗎~~呢個Shopping Mall到幾大，有嘢食又有嘢買，我哋係呢到嘅 Supermarket買咗D嘢食，準備不時之需。之後重係到買咗一對毛毛鞋，因為出面真係好凍~~

買完嘢方便完我哋就去 CK 嘅住宿到，今日住個個地方係離開咗個市中心有段距離，不過就可以泊車，因為先前搵過一D係市中心嘅好多都係無晒位。最後搵咗呢一間啦，呢一間就有車位，重有廚房可以用。我哋去到呢到都差不多成4點鐘，唔次係唔係因為落雪關係，車程都用咗成差5個幾鐘先至由KV到CK。去到呢間 Apartment，係今日係住 Apartment，一泊車，個館主 Martin就出來問係咪我啦。講咗幾句嘢之後，佢就介紹下佢間 Apartment 有D咩，同埋食早餐同煮嘢嘅地方係邊，之後就問我哋會唔會煮嘢食，我哋當然係會啦，因為都有兩日係呢到住，如果搵唔到嘢食，我哋好大機會自己煮架嗎。之後，佢就諗咗一下，就俾咗一間入面有廚房嘅 Apartment 俾我哋啦。

呢一間 Apartment 都幾大下，我哋安頓好D嘢就準備出去行下睇下嘢，順便食埋晚餐，今晚我哋就Book咗食地窖餐廳到食嘢。

我哋差不多成4點半先出發，一路行一路影相，出去個時都重有D落雪，呢到如果唔係今日咁嘅天氣應該會幾靚。行下影下，好快就去到市中心，行到去個中心廣場到見到搭晒D攤檔係到，我哋重以為係聽日星期日會有D露天市場係到擺買添，原來唔係嘅~~~

行行下去到今晚食晚餐個間餐廳附近，我哋就入去個Information Center到暖下先同睇下有無咩資料可以攞，結果係無嘅。我哋大約17:15到到咗間餐廳，因為出面都幾凍，於是乎就入去睇下有無得開早飯先，又有位喎!

開頭佢哋以為我哋係 Walk-in嘅，俾咗張角落頭嘅2人枱俾我哋，之後我同佢哋講我哋Book咗，佢就俾張4人枱俾我哋，不過張4人枱無張2人枱咁好Feel，於是我哋都係要返張2人枱。

睇下個Menu，咦~~~點解無豬手食嘅，睇咗好耐同埋同個職員講佢都唔係好明，之後我就行下睇下間餐廳入面有無人食緊啦，原來真係無喎，後來就見到有一枱人揸住本書問有無烤豬手同埋烤鴨食，個職員答係無嘅~~原來呢一間係無呢兩樣嘢食嘅~~

之後我哋就叫咗 Set 係雜扒同埋一個淨豬扒同一杯Beer，個淨豬扒都幾好食，個個雜扒就Ok啦~~係呢到食，基本上就係食氣氛~~

食完我哋就返去Apartment到休息下，聽日重有一整日係 CK 到，可以聽日先睇D景點 !!

到咗CK

呢間就係我哋會住兩晚嘅Apartment

呢個係公家食堂，如果有叫佢哋個早餐就會係呢到食

呢間就係我哋住兩晚嘅房啦

有廚房

睡房

飯廳

廁所

玄關位

外觀，大家睇唔睇到落緊雪呢...

行去是中心嘅路

行落去就到市中心附近

過埋條就到啦

有紅葉睇

萬聖節裝飾

中心廣場

地窖餐廳

是日晚餐

市中心夜景