2012 捷克、奧地利、匈牙利自駕之旅 (14) - Day 8 Landhaus Osborne(Obertraun) Hallstatt Salz Welten Hallstatt Obertraun (1 Nov 2012)

Day 8 (1 Nov 2012)
Landhaus Osborne(Obertraun) >
Hallstatt > Salz Welten > Hallstatt > Obertraun

今日又係早醒咗，唔知係唔係D時差重未適應呢，都好多日喇喎。尋晚洗完衫將一件保暖衫放咗係一個暖爐到烘乾嘅時候，部嘢應該係幾熱下，攪到件衫燒濃咗，重穿咗一個窿添，好似開咗個Valve咁~~

呢一間Apartment係包早餐嘅，不過睇返佢個網頁可以有 淨係住宿嘅，但係我係 Booking.com 到睇到嘅，只係得包早餐嘅，不過都唔緊要啦~~包早餐就食下當地嘅嘢啦 ! 呢個早餐都幾多嘢食，味道呀~~歐式早餐Ok咁喇，不過佢隻蛋又真係幾好食個喎 !

食完個早餐，我哋Hae到9:30先出發，因為今日會去鹽礦到睇嘢，而佢第一個Tour就係10:20先開始。我哋去到鹽礦就啱啱10:00，咁啱有一班纜車搭上去喎，因為條路都幾多雪下，所以去到個入場辦公室都要行10分鐘先到。入到去個入口到，個職員話啱啱開始咗，要再等45分鐘之後先會有!吓，我哋上到來個時間啱啱好個喎，又要等~~不過都無辦法，佢話唔俾你入都無計。係我哋行上來個時，咁啱有一Pair日本人同我哋一齊行，佢只係行快我哋少少咋就入咗去~~係等嘅期間，咁啱遇到一Pair 香港人，佢哋係尋日來到嘅，本來佢哋想尋日玩呢個鹽礦，不過到咗之後遲得濟所以無玩到，佢哋重要係行路上來呢個鹽礦添呀，話行咗成個幾鐘，不過風景幾靚~~今日佢哋玩完呢個鹽礦就會去Salzburg 到玩，我重介紹佢哋一定要買個張Salzburg Card用，因為真係好抵!

坐下睇下嘢同人傾下，好快就可以入到去啦，入到去就要著返一套外衣先嘅，呢一套外衣有D似精神病院D衫咁~~因為其實出面都重幾凍，所以我哋入面都重係著住先前D衫，整到好似成個肌肉人咁樣~

去到11點就可以入得鹽礦，因為正式開始之前都重要行一段路，又有個Guide會講下個鹽礦嘅歷史…之後就要行一段路，行到去鹽礦入口到，個Guide打開個大閘，然後我哋就要行入去呢個鹽礦~~呢個鹽礦都分咗幾個區域，展示咗D鹽礦工人係點樣工作同埋鹽礦入面係咩工作環境，入面重會講返好耐之前D鹽礦工人係點樣係呢個惡劣嘅環境下工作，同埋有幾多鹽礦工人死係呢個礦坑入面~~不過我哋覺得最過癮嘅就係有兩條木製嘅滑梯係入面有得玩，好過癮~~我哋重每條都玩咗兩次添呀 !!