2010 土耳其自駕之旅 (74) Day 11 - Road to Goreme & 生死時速

31/10/2010 Day 11

Mersin > Nigde > Nevsehir > Goreme > Uchisar > Cavusin > Zelve > Urgup > Zelve > Urgup > Goreme

 

Road to Goreme &  生死時速

今日嘅行程係要北上去 Goreme 奇石林 (Kapadokya) 呢個大景點，要途經 Nigde 同埋 Nevsehir 兩個城上到去 Kapadokya 嘅。今日諗住一早食完早餐就出發，多D時間係奇石林到遊覽下呀嗎 ! 尋日問咗酒店話7點就會有早餐食，點知我哋落到去咩都無，問個職員話要8點先有得食，又俾人老點添~~~最後食完早餐都8點幾啦。呢一間酒店D早餐都幾 Ok 喎，不過其實好多嘢都未準備好晒，我諗如果到咗9點幾個時，應該會多好多嘢食。

今次我哋選擇咗全程行高速公路(即係收費道路)，諗住快D可以上到去Goreme到，一路行都無嘢特別嘢。但係有D路個GPS基本上係無資料，所以會顯示出我哋架車係塊綠色地上面行，(後話:用得多呢部GPS之後，就知道原來係因為GPS地圖資料唔夠新，所以先會係塊綠色地上面行)，因為先前瀨過幾知嘢，所以唔理咁多，睇路牌一路向前行，但係其實都驚會行錯路架，行行下重要去咗一個唔知咩嘅地方(後話 : 其實可以縮細 GPS 個地圖睇下大確位置就得)，重有呢一段路嘅呢一區其實都幾凍下個喎，最凍去到得6度咋 !

之後就係油站到問下人點去 Goreme 啦，行行下又行返一般道路，個 GPS 其實問油站D人之前已經有返資料出現，不過穩健起見問下又無況 ! 其實土耳其D高速公路真係幾抵行，行咗成兩個鐘都係收 TL$2.25咋!!

之後就發生咗一件意外，我諗可能有人命傷亡嘅情況出現。我哋落咗高速公路公路行返一般道路個時，一路行都係有一架車跟住我哋尾行，唔知係唔係我揸得慢呢，其實個時都係唔係行得好慢架，有成 6-70 km/hr 架，不過佢最後係扒咗我頭行人前面。一路行其實都無咩問題，但係行行下架車唔知做咩左搖右擺咁，行行下重要成架車駛咗落個去兩條行車道嘅中間嘅一條大坑到，可能因為車速嘅關係，成架車好似玩特技車個D車咁，成架飛起，之後凌空打咗幾個筋斗，成架車就咁撻咗落去我右前方嘅一塊空地到，我重見到有個人係個地到爬返去架車到，然後好似好驚咁係到咸，呢個過程其實發生係5秒內。個一刻我腦入面諗好唔好停車落車去幫手呢?去幫手會唔會越幫越忙呢?係土耳其如果見到D咁嘅嘢幫咗手之後會點呢?又會唔會被人屈有份造成意外呢?同行者見到呢D場面，之後會唔會有好大陰影呢?我好肯定會有人傷亡，但係我可以幫到咩手呢?係呢個咁短嘅時間內，我諗咗好多嘢，內心有好掙扎，應該要去救人，但係同行者可能會有唔同反應，因為個場面可能幾恐怖。最後我作出嘅決定係繼續向前行，同時我都希望佢哋無事。之後一路揸一路同團友討論返呢件事，佢話好在我哋唔係跟車跟得佢哋好貼咋，如果唔係我哋架車同佢架車好大機會會撞埋一齊，但係個一刻我都無諗過呢一樣嘢，我只係諗停唔停車救人呢 ? 到時真係唔知點算~~~

重有其實佢架車先前扒咗我哋架車頭之後，佢哋都行得唔係好快，重又就係架車成日係到左搖右擺咁，所以我知道架車入面其實係座滿晒人嘅，曾經有一刻我想扒返佢哋頭，不過最後都無，反而因為咁我就同佢哋保持住一段距離。

架車打筋斗再撻咗落地下嘅情景家下重係我腦入面，好深印象，呢一件事令我覺得真係世事無常，所以要珍惜眼前嘅一齊。去完呢個土耳其之旅之後我就買咗個汽車Recorder錄低行過嘅路，同發生過嘅事 !! 家下諗返起，其實呢一個土耳其之旅真係有好多嘢發生~~~所以我一定要完成呢一個土耳其自駕之旅嘅遊記嘅~~

早餐款式都幾多

Mersin的日出

出發向 Goreme 前進

Mersin市呢一棟大廈都幾高喎

行到某個地方外面溫度得6度咋~~

一路行附近都係無咩嘢睇

到咗Goreme啦