2010 台中自駕之旅 Day 4 (1)

2010 台中自駕之旅 Day 4

日期 :   5/4/2010

天氣 : 天陰 & 微雨 & 天睛 

行程 :

台中璽朵精品旅館(A點)  > 集集綠色隧道、集集火車站 (B點) >Lunch@ 梧棲漁港(C點) > 東勢林場 (D點)  > Dinner@烤狀猿日式燒烤 (台中市文心路一段431號)(E點) > 台中璽朵精品旅館 (F點)

行車里數 :  (229 公里 – 大約 5 小時 21 分鐘)

住宿 :  台中璽朵精品旅館

檢視較大的地圖

地圖

今日個行程比較輕鬆，得幾個景點啫 !! 個 Motel 個早餐晨早七點鐘已經準備好放咗係個車房到，個時我都起咗身，於是就落去攞上房啦。我哋個個係幾件雞堡加個包重有加咗杯唔知咩飲品，甜甜哋有Ｄ似茶葉茶，味道都Okay嘅。

呢個就係Motel嘅早餐喇...

睇落去都幾好食架，食落都Okay

台中好多民宿同 Motel 都係用呢一種 Control 晒成間房嘅電器

車房...

 

我哋係途中去咗個南投服務區到放低咗幾兩...呢一類嘅服務區其實同日本個Ｄ驛差不多...我哋重係到見到有個香港團添呀...

 

我哋今日就係九點鐘出發，第一個景點就係本來尋日想去埋嘅集集火車站喇，呢一個係一個日治時代日本軍起來運輸木材嘅一條火車線，家下就變咗做遊客嘅觀光點，遊客重可以搭一下呢一條鐵路添(不過我哋無搭!!)。係去呢個集集火車站嘅路途中見到有個牌寫住集集綠色隧道，當然要去睇下啦，呢一綠色隧道其實係一Ｄ樟樹圍住嘅馬路，都幾長下，我哋就係到周圍影下相。上車繼續行程行行下又見到有兩架坦克車放咗係到，我哋當然又係要落車去影下相喇，三哥同二哥都行咗入去架坦克車入面影相，影完相之後上車繼續行程嘅時候，三哥發覺雙腳已經俾Ｄ餓咗好耐嘅蚊咬咗好多嘢啦....成腳都係蚊癩，真係聞者傷心見者留淚啦 !! 二嫂佢哋又帶咗Ｄ祖國出產嘅湯火膏，俾三哥搽下，應該有效呱 !! 去到集集火車站有間木廠嘅女職員見到三哥對瘋爛腳就俾咗Ｄ專門搽蚊咬俾三哥搽，過咗一陣果然係有效呢....

集集綠色隧道

呢一到就係集集線啦

有個團友想瞓一瞓火車軌

惡蚊溫床坦克車

去廁所都有五式

受害者

跟住我哋就係個火車站到影下相，影影下有架火車駛入站，我哋當然係唔好執輸去影哈啦....影完就係個火車站到買咗Ｄ雪條食，味道都唔錯呀 !! 

睇完呢個我哋就去梧棲漁港到食Lunch，途中經過一個唔知咩地方，我哋又落車影下相 !! 去到梧棲漁港都成點半鐘，當然係要搵咗嘢食先啦 !! 我哋就行咗入去食嘢嘅地方，個Ｄ人好似Ｄ蜜蜂見到蜜糖咁係咁行埋來，最後我哋都揀咗一間，叫咗幾個餸食，味道叫做可以啦。

途經呢一個唔知咩地方，見幾靚就影下相....