2010 台中自駕之旅 Day 3 (3)

接住我哋就要去清境小瑞士花園 ，係網上面睇過Ｄ人嘅評語係無去都無損失，但係我哋有時間就去睇下啦....嘩~~~呢一個景點嘅入場費就咁多個中最貴嘅一個，入到去我哋以為好多地方行添，原來~~~唓~~~無料到嘅，得好少嘢睇，重有就係個Ｄ代用卷係唔可以一次過用晒，每次只可以用一張喎 !! 有無攪錯，呢個景點真係要介紹俾Ｄ好朋友先得 !! (但係影相又幾靚喎 !!)

如果係山區你哋見到Ｄ薯片唔係漲的話就一定有問題啦....

離開咗呢個清境小瑞士花園 ，我哋行行下見到有間幾靚嘅建築物，於是就停車去睇睇啦。原來呢間係一間酒店，啱啱起好，未正式營業，叫做 The Old England(睇返Ｄ資料原來同我想之前Book個間係同一個集團嘅，唔怪得咁靚啦)，價錢都幾貴(包一泊兩食)，但係就幾特別，我哋就係入面影下相咁 !! 睇返網上Ｄ資料，入面真係好英國式個喎，同埋真係幾靚~~~但係正式營運個價錢真係幾貴，一間雙人房要 NT$11,000，勁 !!

加插景點，英國式建築物~~~THE OLD ENGLAND老英格蘭

入面都幾英國Feel架 !!

 

睇完呢個英國式建築物後，我哋就要離開清境返落去台中喇，返去台中都要成差不多兩個鐘嘅時間。入間Motel個地址個GPS又搵唔到喎，於是就入個台中逢甲夜市 入去先，去到附近先搵間Motel係邊啦 !! 因個個台中逢甲夜市 係係間Motel附近，一入去到去市中心就開始塞車喇。入到去就停係附近到再入過間Motel個地址，但係都係無資料喎，好再訂嘢個間7仔係Motel對面，入間7仔入去就基本上搵到間Motel，哈哈 !! 真係搵到，我哋去到間 Motel 都成差不多六點九，個職員同我哋講話有兩間房俾咗人，淨低兩間喎 !! 我哋當然要理論一番啦~~~結論係呢Ｄ Motel 只會 Hold Ｄ房30分鐘，但係佢哋無講過呢個條件俾我知呢~~~好在最後佢哋都安排都另外兩間俾我哋，但係個價錢就貴咗囉 !! 同埋都要成10點先俾到房我哋，呀~~我哋住呢間 Motel 叫做台中璽朵精品旅館 。唔理啦，係呢個情況重點去搵啦，我哋重要一連住兩日添架嗎，當然係馬死落地行啦 !! 我哋首先就將Ｄ行李放晒係其中一間房先，因為我哋要出去行呢個台中逢甲夜市，其實由呢個 Motel 行去 台中逢甲夜市，應該係半個鐘之內會到，但係外母唔係好行得，又因為頭先經過過個夜市附近發覺非常塞車，所以我哋就決定搭的士啦 !! 叫  Motel 幫我哋 Call 車，點知有一架車聽到話去台中逢甲夜市就話唔去喎，攪到我哋又要等多一陣，可能因為個到非常之塞車嘅原因呱。

Motel 外觀

原來搭車去都其實唔係好耐(講緊唔塞車)，但係我哋個晚就幾塞車下，架車都未去到個司機就叫我哋落去行去，我心諗行去應該會快過係車到等啦~~~去到台中逢甲夜市就見到幾條長龍，呢Ｄ我睇無返一個鐘你都唔洗旨意有得食，排長龍嘅有大腸包小腸，炸雞排....於是我哋就行入去睇下啦，成條街都係人，真係好似行年宵市場咁，又唔知係唔係因為係星期日晚嘅關係呢 ? 我哋係入面買咗Ｄ炸菇、炭燒炸雞排(呢一個成個鐘先食到)、炸雞排(呢個炸雞排食完個個炭燒炸雞排都重未攞得)胡椒餅、一Ｄ飲品、炸薯波重有就係士多啤利，呢到就行咗我哋成兩個幾鐘喇 !! 而外父外母就安排咗佢哋去食Ｄ蝶頭飯，佢哋坐到人哋收檔，所以要係街邊到搵個位俾佢哋，因為真係實在太多人啦.....

你哋睇下...真係 People Mountain People Sea(人山人海) 架....

呢一檔就係等足成個鐘嘅碳烤雞排啦....

中途食咗個日式煎餅

士多啤利

真係好似行年宵咁....(個個星期都係咁的話都幾勁喎)

行完食完我哋就返 Motel 休息啦，三哥係搵的士時成個人係馬路到奔走，真係險象環生...我哋返到 Motel 都成十一點幾，嘩~~今日真係幾攰下 !! 重有就係我哋發覺多咗四盒米通，可能係呢間Motel送俾我哋陪罪都唔定，因為先前真係幾勞氣架 !!

呢一間就係我哋住個間啦....

都幾有情調架 (梗係啦...其實同香港嘅時鐘酒店一樣)

幾大個按摩池.....