2017 日本山陰山陽自駕之旅 Day 1

Day 1 5/8/2017 星期六

香港 > 廣島 >小谷 SA > 島根県出雲市

小谷 SA

日本〒739-2121 Hiroshima-ken, Higashihiroshima-shi, 高屋町小谷

今日主要係搭飛機同埋揸車去目的地出雲，原先係諗住一路玩上去。不過，一開始由廣島搵住宿就發現好多酒店都無晒房，有嘅都好貴，咁一路搵就搵到出雲個價錢就合理D，所以一落機就揸去出雲。

出發時啱啱又有個颱風打去日本，係九州下面打上去，預測路徑係會打去中国，當然希望佢唔好影響我哋個行程啦。

係T2到食咗個早餐就去 Checkin 喇，原來係T2到都可以入閘個喎，之前一路到係以為要返過去T1個邊先可以過海關嘅添~~~

HK Express 呢班機遲咗成半個鐘先起飛，又遲咗成半個鐘先到，之前搭個D遲咗起飛都會係預定時間到達目的地，不過今次就無。

到咗廣島機場，用咗唔洗半個鐘就出咗海關同埋攞埋行李，之後就去攞車。廣島機場攞車Counter係要去返國內線到嘅，不過個個Counter到只係登記完車你去租車公司到攞車。

今次係經 Toyota-rent-a-car 租車，因為有八折(經香港或者台灣嘅Toyota-rent-a-car就會有八折)，又可以揀指定車輛，因為今次我哋4個人，所以就要一架可以放到最少3件大行李嘅車。今次租咗Sienta HV，佢個車尾箱又真係幾大下。

搞好晒D嘢都成差不多1730先出發，目的地係出雲，要行153km，所以就要行有料道路。平時我就一定係無料架啦，所以都租埋呢個ETC。出發時個GPS預計8點到到達，行咗無耐有個分叉路入錯咗，重要係無得返轉頭，再加上有架大車係後面，所以就迫住要行上去啦。呢D有料道路真係無咩位可以返轉頭，行到一個SA，見都差不多1800就順便食埋嘢先繼續行程喇。

食完繼續行，見到有個路口，於是駛咗落去等GPS再搵過條路行。最後，我哋係2030先到出雲，途經兩間超市，我哋就入去買咗D水同生果。之後成差不多2100先到酒店，酒店個停車場又滿咗，又要泊去其他地方，聽日就正式呢個日本山陰山陽自駕之旅。

宿: スーパーホテル出雲駅前 (Parking MC: 134 361 720*82)

SA食埋Dinner先繼續行程

超市買咗D水同生果

開餐