今日晨早起身想多D時間享受下呢一間咁正嘅農莊嘅住宿，今朝一早呀Moody就係門口到，於是我又放咗佢入屋~~~
整好晒早餐之後就要嘆返下先得，今朝個早餐係農場雞蛋炒火腿加烘焙多士。係D咁正嘅環境到食早餐都特別好食嘅。呀Moody真係好鬼識食，俾麵包俾唔食，但係俾D火腿佢又食喎，重要食完就走人喎...拜拜都唔講聲~~~
之後我哋就去埋農莊另外一邊參觀埋，但係就無咩特別，可能要入來參選先有嘢睇呱~~~然後我哋就向 Tamar River 出發啦....第一個景點就諗住去摘士多啤梨，所以去一個叫 Hillwood Cherry Farm，點知就Miss咗個路口，落咗去個碼頭個邊，見到有人係到釣魚喎，又幾鬼寫意喎....之後見到有個牌寫住 Batman Bridge 嘅橋，我哋以為係景點，咪跟住個牌去搵，點知搵咗兩次都搵唔到，重要個 GPS 又帶我哋行Ｄ泥路仔。呢條Batman Bridge原來係將 Tamar River 兩岸連接埋嘅橋來嘅。行下行下見到都幾近個LowHead嘅地方我哋就順便去睇下有咩睇啦~~~原來係無嘢睇嘅....不過好似話呢個位置都有企鵝上岸睇個喎...
之後我哋又再去搵個 Farm ，搵到個 Farm ，但係呢~~~好似無得摘咁嘅，入面就有間 Cafe 係到，有人係到飲嘢同食嘢囉。睇過下佢哋塊田，D士多啤梨好細粒~~~於是我哋都係走人啦~~~
見時間尚早我哋就諗住去埋個 Lavender Farm 啦，不過由呢個 Cherry Farm 出發去都要成個幾鐘先到，去到見到佢哋門口D Lavender 開咗喎，諗住有 Lavender 花田睇添，點知入到去，無嘢睇嘅~~~又混吉添~~~佢入面其實有間專買 Lavender 產品嘅Shop，不過我哋無入到去睇，因為睇過人哋D Blog 話 D 嘢重貴過係出面買喎...所以我哋睇完無花嘅 Lavender 花田就走人啦....
之後我哋係去睇呢個鴨嘴獸、刺蝟同海馬啦，個GPS教行返去 Lavender Farm 條路徑不過就係反方向，開頭以為係又帶我哋行D唔知咩路~~~原來最後係會行個條 Batman Bridge 過對面岸嘅，Batman Bridge 原來係一條吊橋，我哋重以為係好似 Ross Bridge 同 Red Bridge 個D 橋添~~經過呢條橋好快就到咗 Platypus House 同 Seahorse House，外表成個貨倉咁~~~
係澳洲參觀D嘢有個唔好處就係全部都要有人帶住(都可以話係好嘅，因為有人會講解俾你知D嘢係點解囉)，我哋 13:45 去到 Platypus House，要14:00先有得睇，個導賞員首先會介紹D Platypus 嘅習慣同生活模式，又會餵 Platypus。同場加映個刺蝟，佢哋又係餵嘢俾佢哋食，D刺蝟行路個時左搖右擺好鬼得意，重有就係佢哋D手掌同腳掌係向天個喎，真係幾攪鬼。睇完我哋就去睇海馬館，其實呢個館無嘢睇，無時間可以唔洗睇~~~去到又要等到15:00先有得睇喎 !! 原來得我哋兩個人睇咋，個 Platypus 睇完都係搭半到，重有成半個鐘要等下，其實我哋都未食Lunch，於是就上車到食幾個蛋糕仔充下饑先...
到咗15:00我哋就去睇呢個 Seahorse 啦，入面放咗係唔同水域嘅海馬係入面，重有唔同嘅品種~~~個導賞員好攪鬼，一路講嘢一路係咁郁雙腳好似係到跳舞咁~~~其實D海馬都幾靚，有D重要係五顏六色添。睇睇下有一家人入咗來睇，之後就會睇下點樣餵D海馬同埋點樣培養D海馬，重有就係佢哋會食D咩呢~~~原來個D海馬BB好鬼細粒，如果唔講其實根本就唔知道係海馬來嘅~~~
睇完呢個海馬館都差不多成16:00喇，之後我哋就要去今晚嘅住宿到 Check in ，呢次呢間住宿外表都幾靚仔，入面就唔係好大間，但係就有 Microwave同少少廚房設備，但係係唔可以煮到嘢食架...我哋整理好晒D嘢之後就出去附近睇下有無嘢食啦，原來係好近嘅附近有一個 Shopping Centre ，入面重有幾間食店添。呢到重有間好大型嘅超市，可以買下D食物，可惜嘅係我哋今晚係煮唔到嘢食架...
我哋行咗個Centre 一輪之後，就入去超市買咗D蛋糕仔以備不時之需，然後就去 KFC 到食返個 Dinner 啦，個餐差不多要成 $20 ，其實都幾貴，定係其實係香港D嘢平呢....之後我哋就返去住宿嘅地方，順便想搵下附近嘅一間酒莊，呢間酒莊有得住同有餐廳架，原先本來Book呢一間，不過個價都幾貴，所以最後無Book到....最後我哋都係搵唔到，但係就見到有幾間 Apartment 幾似個酒莊入面嘅住宿 !!
之後就返去我哋住宿到行下啦，呢到其實係叫做瑞士村，有幾個位置其實都幾似瑞士~~~重幾靚添~~行完就返去休息...
沒有留言:
發佈留言
來到留返句說話先走啦...