~~~活在當夏~~~: 2018 波蘭．波羅的海三小國自駕之旅 Day 9 24-3-2018 Saturday (Rundāle, Latvia)

2018/05/12

2018 波蘭．波羅的海三小國自駕之旅 Day 9 24-3-2018 Saturday (Rundāle, Latvia)

Tartu 塔爾圖 (Estonia 愛沙尼亞) > Bauska (拉脫維亞)> Lunch@Aveņi > Hotel Rundāle > Rundale Palace隆黛爾宮 > Hotel Rundāle > Dinner@Aveņi > Rimi Bauska > Hotel Rundāle

今日我哋就去返拉脫維亞，得一個景點就係睇呢個隆黛爾宮，Wiki係咁解說

隆黛爾宮（拉脫維亞語：Rundāles pils；德語：Schloss Ruhental）是位於拉脫維亞城市包斯卡附近的一座宮殿建築[1]。隆黛爾宮是拉脫維亞最著名的巴洛克建築，修建於兩個時期，分別是 1736至1740年和1764年至1768年。如果想詳細知道呢個皇宮嘅歷史，可以睇下呢個Blog，佢都寫得幾詳細。

呢間酒店嘅早餐都叫多款式，味道就普通啦。食完早餐我哋就8點幾出發，由Tartu 塔爾圖去呢個Rundāle (Latvia 拉脫維亞)要成4個幾鐘先到。中途入咗一次油，其實最主要係去廁所到放低啲嘢啫。

我哋大概12點到就到咗Rundāle隔離個個城鎮Bauska，咁就去搵食先。因為Rundāle係無咩餐廳有得食嘢，為免去到無得食，所以我哋就係呢到食個Lunch先。上網Search到有一間係附近叫Aveņi，又有得泊車，所以我哋就去呢一間喇~~~

係呢一間餐廳隔離重有間Bauska Motor museum，不過我哋就無入去睇，如果你哋有機會去呢到，可以入去睇睇。呢一間餐廳都幾特別，有啲位整到配合返出面嘅裝潢。睇個Menu，除咗啲西餐之後，呢到又係有泰菜食個喎，又有冬蔭功湯飲，我哋當然會叫來試下喇。我哋就叫咗一個炸雞意粉、咖哩雞飯(原來個飯係紫米來個喎)、果汁同一件提拉米蘇。呢到嘅嘢食嘅份量都幾多下，我哋兩個人食完碟意粉同飯都已經好飽，重要食埋件提拉米蘇~~~不過件提拉米蘇又幾好食。

食完我哋就去酒店到Checkin先，不過酒店到就無人，咁我哋就去皇宮到參觀啦。我哋去到嘅時候有一兩架旅行巴係到，係呢啲唔係旺季嘅時間都又咁多人來參觀，呢個皇宮果然係有啲吸引力呀~~

皇宮入場費每人EUR$9，不過呢個價錢係呢個時間先有，因為如果夏天來，要睇埋個花園要另外俾錢，因為家下個花園係無花嘅~~~重有就係呢到影相要俾影相費，不過其實我見啲人都無Check到嘅

入去呢個皇宮參觀係要著鞋套嘅，應該係費時你哋整污漕啲地方，因為行入皇宮條路係泥路來嘅~~~呢個皇宮有黃金廳同埋白廳，重有好多陶瓷嘅製品，其實呢個皇宮都幾華麗。睇返有人影啲高空圖，呢個個皇宮加埋個花園都幾靚個喎，我哋去呢個時間有啲地方係維修緊無得睇，但係其實我哋都唔知邊到有無得睇~~~睇完皇宮，我哋就去睇下個花園，雖然知道應該無咩睇。無花之下，真係無咩嘢睇，但係呢到有幾個Pokemon嘅Gym係到，我哋就順便放隻上台，隻Pokemon係我哋返咗香港成個星期先俾人打返來。

睇完我哋就返去酒店到Checkin，睇來今日得我哋住，因為唔見有其他人入住，可能呢個真係淡季都唔定~~間酒店房係二樓，又要搬行李，房就真係幾細下。休息咗一陣就出去食晚餐，搵過一輪，都係去返食Lunch個一間到食，因為真係幾好味。