~~~活在當夏~~~: 2016 日本中部北陸自駕之旅 Day 9 5/11/2016 星期六 (23) 藤助の湯　ふじや

2016/12/31

2016 日本中部北陸自駕之旅 Day 9 5/11/2016 星期六 (23) 藤助の湯　ふじや

Day 9 5/11/2016(Saturday)
富山縣 (五箇山相倉合掌造り集落) > 白川郷合掌村) > 白川郷荻町城跡展望台 > Lunch@蕎麦庄 > > 道の駅白川郷 > 藤助の湯　ふじや > 白川郷荻町城跡展望台 > 藤助の湯　ふじや

食完我哋就去住宿方向行，途經呢個道の駅白川郷，我哋就入去參觀下。呢到入面重有一個介紹D合掌屋嘅結構係點樣，同埋係點樣起嘅。睇完我哋就去今晚嘅住宿藤助の湯　ふじや，呢一晚嘅住宿係全個行程最貴嘅，要成¥43,200。其實原先係想住係白川郷入面，但係我哋Book得比較遲，所以基本上都無得選擇。係白川郷入面可以經Jalan訂房嘅有3間，樂天就有好多間，Bookig.com都有幾間。But 係白川郷入面得一間城山館(しろやまかん）有得Book，重要係差不多¥50,000，雖則今次諗住係豪住宿團啫，但係都不能夠接受，況且包嘅嘢都好一般。不過開頭都係諗住係呢一間，因為都係想係白川郷入面住下，期間當然會留意下有無其他住宿會有房有人放出來喇~~~跟住有一日手痕睇下呢個Booking.com入面有トヨタ白川郷自然学校同藤助の湯出現，トヨタ白川郷自然学校呢一間唔洗¥20,000就有交易，重要幾近白川郷，不過呢入面嘅設備就比較普通D。跟住就係呢一間藤助の湯，要¥43,200，入面有露天溫泉，重有貸切風呂，個樣重幾靚仔添，係Booking.com評分有10分(10分係滿分)。所以我就取消咗城山館個Booking訂呢一間藤助の湯，不過期間都繼續望下白川郷有無房。到就快出發前幾日，係Jalan見到白川郷の湯有房喎，不過訂極到訂唔到。

講返間藤助の湯先，我哋入咗電話去個GPS，由白川郷去都要成15分鐘車程。到咗~~~就泊架車係住宿對面，不過呢~~同我係網上面睇嘅有D出入，但係佢寫住ふじや旅館，我哋無咩為意到。咁我哋就入去啦，個格局又真係一間民宿來個喎。入到去一個人都無，咁我哋就大聲叫下啦，有兩個婆婆行出來，心諗呢兩個婆婆咁勤力，咁大年紀都重做嘢嘅，應該係家族生意來嘅。我哋就同婆婆講Checkin，婆婆唔知咩嘢。搞咗一輪，婆婆就叫個後生女出來，原來我哋住嘅地方唔係呢到。

佢就帶我哋去我哋今晚嘅住宿到，原來係過多一個街口先係，個樣就似我係網上面睇到嘅。泊好車，就搬D行李入去啦，佢哋首先叫我哋坐咗係個爐旁邊，又有D嘢食同埋有嘢飲。之後就安排我哋入房，順便介紹下呢個住宿入面有咩設備。呢到有個露天風呂，行行下又介紹有貸切風呂，重要係免費嘅添~~~

之後就去到我哋住宿，房入面淨係得廁所，就無浴室嘅，即係要係出面沖涼。唔緊要啦，我哋都會去浸溫泉，其實都已經沖埋涼喇。

之後我哋就去浸返個貸切風呂先，然而就返房休息下，跟住就去荻町城跡展望台到睇白川郷合掌村夜景。我哋今次直頭揸埋架車上去，去到都有好多人係到。但係其實都唔知有咩影，見到D人用D長鏡Zoom埋去影D合掌屋，我哋就影咗幾張相就走人，因為要返去食晚餐。

道の駅白川郷