2013 馬來西亞榴槤忘返自駕之旅 Day 7 (7)

2013 馬來西亞自駕之旅 Day 7 27/12/2013

Heritage Hotel Cameron Highlands >Cameron Lavender Garden>玉峰谷蜂園>Lunch@師父榮大酒家有限公司>高原蝴蝶園> BOH Tea Center Sungei Palas>Brinchang夜市>Dinner食Brinchang夜市買嘅嘢食@ Heritage Hotel Cameron Highlands

今日行程就比較 Hea 架，我哋首先去享用呢個美味嘅早餐先，Book呢一間酒店嘅其中一個原因都係因為有人話呢一間酒店嘅早餐幾好食，試過又真係無假喎，煎蛋當然係唔小得啦，因為真係好有蛋味嘅呢~~食完我哋又上房到 Hea 下先，然後就出發去一個叫Cameron Lavender Garden嘅景點，呢一景點都係尋日經過個時見到，見到有好多人停晒車入去睇，所以今日我哋就去睇下啦~~去到都有唔少人來咗，我哋就要將架車泊係另外一個地方到，都係一分鐘路程範圍內嘅。之後就要買飛入場啦，一入到去就會見到一個花海仔，都幾靚嘅，好多人企晒係呢到影相喎。之後我哋就周圍行下咁，佢入面重有一個自摘士多啤梨園，不過D士多啤梨就好細粒同埋都唔靚嘅~~~不過我哋都係到買咗一盒來試下，有D甜就有D無咩味，食完我哋就走人，準備去搵地方食Lunch。去搵食途中見到有個養蜂場就入去睇下啦，不過無咩睇，行兩行我哋就走人喇。之後就去咗附近嘅一間叫師父榮大酒家有限公司到食咗個Lunch，架車可以泊係街邊或者佢哋個商場到都係，呢一間係中式酒樓，我哋叫咗幾個餸，味道都OK啦，不過呢到叫水要俾錢架~~~

食完嘢，就去咗一個叫蝴蝶谷嘅地方到睇蝴蝶，入面真係有好多蝴蝶，有D重可以放係你隻手上面都得架。重有就係呢到除咗蝴蝶，重有其他嘅昆蟲睇，好似蛇、蜥蝪呢D昆蟲~~~睇完我哋就去返BOH Tea Center Sungei Palas到食返個Tea先，不過我就行錯咗個方向，攪到浪費咗成半個鐘時間添。

呢一次我哋就將架車泊咗係個中心附近，所以就好近。我哋叫咗幾款嘅茶，又叫咗幾款嘅 Cake 食下，D茶嘅味道都唔錯，D Cake 都幾好食添喎，我哋又係呢到影下相Hea下，不過呢到其實都幾凍下。

食完Hea完我哋就去Brinchang夜市到行下同睇下有無咩食，呢到附近基本上無咩位可以俾架車泊到，不過之前經過呢個夜市之前我見到有條斜路應該可以泊下車，最後我哋都係泊係呢條斜路到。好啦，呢個夜市入面都幾多嘢食個喎，重有炸大樹菠蘿同埋榴槤買添喎。我哋行咗一陣就決定係呢到買D嘢食，然後返酒店開餐，我哋買咗一隻燒雞、炸蝦、夾餅、蕃石柳蘋果同呢個士多啤梨味蘋果、燒雞翼、重有D甜品同一D飲品，我哋重即場買咗D粟米來食添呀~~

買完行完就返去酒店到開餐，大家都食得好滿足呢~~~食完就要休息啦，聽日就要返去吉隆坡啦~~~

Heritage Hotel Cameron Highlands	MYR$ 920.00
Cameron Lavender Garden Entry Fee	MYR$ 30.00
士多啤梨 @ Cameron Lavender Garden	MYR$ 10.00
Lunch @ 師父榮大酒家有限公司	MYR$ 154.60
高原蝴蝶谷 Entry Fee	MYR$ 35.00
High Tea @ BOH Tea Center	MYR$ 67.30
Dinner @ Brinchang Night Market	MYR$ 134.00
	MYR$ 1,350.90