2013 馬來西亞榴槤忘返自駕之旅 Day 4 (4)

2013 馬來西亞自駕之旅 Day 4 24/12/2013

Hotel Sentral Georgetown >熱帶香料園 Tropical Spice Garden > Lunch@End of the World (佔光海鮮餐館) > 如意園 (Unifam)@Jalan Teluk Bahang >熱帶果園 > 寶盛園 (無開到) > 榴槤檔@Jalan Teluk Bahang >水中清真寺 > Dinner@老姨魚翅 > Gurney Paragon Mall

好啦~~今日就會係檳城到玩多幾日先會走，行程就唔會趕嘅，我都係抱住去到幾多就幾多啦~~~最緊要 Hea~~一開始梗係要食早餐啦，呢一間酒店係包埋早餐嘅，都叫做OK啦~~最出色係D蛋，香港真係食唔到，好有蛋味，食完嘢，我哋例牌上房休息一下之後先出發。

今日第一個景點就係去呢個熱帶香料園 Tropical Spice Garden，呢個熱帶香料園係檳城嘅西面，其實今日我哋到會係西面呢到睇嘢。

由酒店去呢個熱帶香料園 Tropical Spice Garden都要成差不多50分鐘先到，呢個園又係可以周圍泊車，不過如果係旅遊旺季可能要泊得幾遠下先得，因為其實都唔係咁多泊車位。泊好車就要買飛入場，入去之前重會幫你噴D驅蚊水，因為話晒都似係一個森林咁架嗎~~入面有一Part就主要睇D香料嘅植物，不過我哋都係睇到一兩種，之後其餘嘅地方都無咩睇，呢到幾其實重有個Cooking Class 可以Join，不過價錢就唔平，主要係會教你用D香料來煮下嘢，如果有時間Join下都無咩所謂~~裡面重有一間買香料嘅舖頭，D香料又係唔平個喎，不過都平過係香港買嘅~~

睇完我哋就去搵食啦~~問咗呢間熱帶香料園入面D人附近有咩好食，佢哋介紹咗一間叫 End of the World嘅食店，之前係網上面搵到都係話食海鮮。揸咗大概10分鐘車程就到咗個迴旋處，就見到個間End of the World，不過我哋無停到，因為去睇下附近重有無其他嘅選擇。揸咗一段路仔，睇咗幾間，好似都係呢間End of the World穩陣D，架車又係就咁泊咗係出面就得啦~~

叫咗D魚、蝦(無叫蟹)、菜之類嘅嘢食，D魚又真係幾好食喎，其餘嘅都唔差。食飽咗，就繼續我哋嘅行程啦，之後我哋會向南行，即係會係呢條Jalan Teluk Bahang到行，點解行呢到，有咩睇呢?咪就係呢條路到有好多果園嘅，最主要係想來食榴槤。不過係網上面睇過，榴槤嘅季節已經過咗，應該係無咩榴槤食嘅。

行咗一段路仔上咗一陣山就見到有一個果園，出面掛住好多榴槤係到，咁我哋梗係停車落去睇下喇~~嘩~~重有貓山王同埋D24，重有個叫青皮嘅~~問一問價錢，貓山王MRY$25/kg…D24 MRY$18/kg，個青皮都係 MRY$8/kg，我哋要咗個貓山王同埋一個青皮，埋單都係MRY$69…真係好抵，重要係樹上熟，好好味。我哋成團人，有三個人唔食嘅，最後三個中有兩個都食埋~~~真係好好味。呢到除咗榴槤之後，重有山竹買，我哋都買咗一D來食。食完呢一檔，之後就繼續向前出發啦，其實我哋嘅目的地係想去呢個熱帶果園嘅，係去呢個熱帶果園途中我哋又見到幾檔買榴槤嘅攤檔，入面都有唔少嘅榴槤買嘅。

我哋去到呢個熱帶果園到，原來係要Join佢哋個導賞團先至可以入去果園到參觀，個Guide Tour係包個導賞同埋有D免費嘅生果食，不過每一個人嘅參觀費要成MRY$35/person，嘩~~都幾貴，所以我哋睇咗佢哋買嘢嘅地方一陣同埋去咗個廁所之後就走人啦~~然後就去呢個寶盛園喇，點知去到話佢哋已經收咗爐啦，因為榴槤季節已經過咗啦，咁我哋就唯有走人去第二度睇嘢喇。

準備揸返去呢個檳城個時，有團友話太抵，要食多一轉先得，所以我哋就去咗另外一檔到又食過，我哋叫咗一個青皮、一個紅蝦，呢一檔重要就買二送一添，送咗一個叫 Butter 嘅，埋單多謝MRY$80。個青皮同埋個紅蝦都幾好味，而個個唔洗錢送嘅Butter就唔係咁好食啦~~食完之後大家都大滿足~~臨走前又買多一個D24諗住聽日食，呢個D24都係要MRY$45咋~~~之後我哋又經過呢個我哋食嘅第一檔，又想買呢個青皮食下，點知買買下又買多一個貓山王喎，一個青皮加個貓山王都係 MRY$65咋，真係好抵食囉~~~其實係馬來西亞基本上好多酒店都係唔俾人帶榴槤返入房嘅，所以我哋都係鬼鬼鼠鼠咁攞返入房，然後放咗入去個雪櫃到。架車係未返到去呢個酒店嘅時候係充滿住呢個榴槤味架，當然有一個人食好不滿啦~~~本來我哋就諗住去呢個義香到買下手信嘅，行行下經過呢個水上清真寺就入去睇下啦，呢到又係可以免費泊車嘅，不過就好滿下，又機會要等下先有位，不過我哋去到個時就啱啱又個位可以泊。呢個水上清真寺入去參選其實係要洗腳同埋要除鞋嘅，重有原來著短褲嘅都唔入得去個喎，要披一件嘢係腳到先入得去，不過我哋就一支箭咁入咗去，但係另外一個團友就要披件圍巾先入得去。呢個水上清真寺都幾大，寺入面D壁畫都幾靚，如果水漲嘅時候呢到外面應該幾靚，咁我哋影完相就走人。見都成6點鐘，我哋就唔去呢個義香啦，因為費時去到摸門釘喇。咁我哋就去搵食啦，今日平安夜，咁就食好D，去食呢個魚翅啦，呢一間係一個團友嘅同事推介嘅，網上面都無見過，其實係一間私房菜叫老姨魚翅。嘩~~呢一間老姨魚翅都幾難搵，開頭原來個GPS已經帶咗我哋去呢個，但係佢就咩指示所以我哋以為搵錯地方，因為佢係一間住宅咁樣架，到最後我哋都係要打電話去問先搵到。

入到去得我哋一班人去食，可以話係包廳啦~~~

我哋叫咗特別一品鍋(入面有魚翅同鮑魚)、蛋麵鵝掌、蟹蚶粉絲、牛奶香蝦重叫咗一個炒菜。嘩~~個魚翅真係幾好味，而呢個蛋麵鵝掌、蟹蚶粉絲、牛奶香蝦又係好好食，呢一餐真係大滿足啦~~~呢一餐埋單要成MRY$770…

食完嘢就要去行下啦，我哋去咗呢個Gurney Paragon Mall到行，其實佢就係呢個新關仔角附近，不過呢個Shopping Mall我哋無買到嘢，可能D嘢唔啱我哋嘅Style呱~~~之後就返去酒店休息，返到去我哋重要鬼鬼鼠鼠咁分批上去，怕比人發現我哋偷運榴槤上房~~

熱帶香草園 Tropical Spice Garden	MYR$ 102.00
Lunch @ End of the World	MYR$ 325.70
榴槤	MYR$ 69.00
	MYR$ 80.00
	MYR$ 45.00
	MYR$ 65.00
Dinner @ Lauee 老姨魚翅	MYR$ 770.00
Parking @ Gurney Paragon Mall	MYR$ 2.00
	MYR$ 1,458.70