2013 馬來西亞榴槤忘返自駕之旅 Day 5 (5)

2013 馬來西亞自駕之旅 Day 5 25/12/2013

Hotel Sentral Georgetown > 極樂寺 > 鐘景泉買荳蔻手信 > Lunch@伍秀澤海南雞飯 > 壁畫@ Georgetown > Love Lane >姓氏橋 Clan Jetties>臥佛寺>緬佛寺>義香餅家>Dinner@汕頭街>肉骨茶@益香綁線肉骨茶 > Hotel Sentral Georgetown

好啦，今日就係最後一日係呢個檳城都玩啦，一早當然係食呢個酒店早餐先喇，我哋又食佢嘅蛋喇，真係好好味喔~~食完我哋就要返房 Hea 下順便要攞埋D榴槤出來食喎，所以我哋又係好迅速咁攞D榴槤上車，不過D榴槤放咗係房入面個雪櫃個時都好大陣味。

我哋今日第一個景點就係去呢個極樂寺喇，原來尋日食魚翅個間私房菜就係係呢個極樂寺附近嘅。呢個極樂寺泊車就要俾停車場費嘅，不過都係個一兩蚊，抵俾喇。泊好架車我哋就參觀下呢個極樂寺啦，其實佢都幾大，呢到重可以搭欖車上去睇呢個大觀音，後來發現除咗搭纜車上去，原來係可以揸車上去個喎。係呢個極樂寺入面重有一間鐘景泉係到，不過我哋入到去睇完就無買到嘢。睇完我哋就要開餐，食呢個榴槤啦，我哋係呢個極樂寺入面搵咗一個地方就開餐，查實都幾大陣味，有好多人都眼望望我哋，不過就唔理啦。我哋有三隻榴槤，不過雪咗一晚之後真係無係果園即開個時咁好味~~~但係都唔錯啦。

食完原先諗住去呢個依淡巴剎到食叻沙，不過就搵唔到位泊車，所以就唯有放棄啦。

之後我哋就去咗呢個伍秀澤海南雞飯到食Lunch喇喎，呢到又係泊係街邊就得。嘩~~去到呢間伍秀澤海南雞飯入面人頭湧湧，我哋叫咗一隻海南雞、一隻燒雞(有好多人叫呢隻燒雞)，原來真係隻燒雞好食過隻海南雞喎，唔怪得之咁多人叫燒雞喇。食完我哋就去搵壁畫啦同埋去呢個Love Lane喇，咁啱無線又播呢個單戀雙城，睇返真係好有回憶喔。呢D壁畫散佈係唔同嘅位置，最多人去睇嘅就係個個踩單車個兩姊弟個一幅，要排隊先有得影呀~~~係呢一幅壁畫嘅附近重有D攤檔買下D記念品添架，不過我哋揀唔啱。

睇完壁畫，我哋就去咗周氏橋，呢到都有得泊車，但係我見到D車全部都係頭尾連住泊，好明顯就係要留車匙喇。附近有一個油站喎，咁我哋就去咗入油先，順便問下佢可唔可以泊係到啦，因為見到有好多位係到，開頭都話唔得，講多兩講就話留個電話號碼係到就得啦~~哈哈~~~電話號碼~~~諗諗下我哋D上網咭應該有電話號碼嘅，嘻嘻~~咁就可以放架車係到啦~~~

呢個周氏橋真係好似大澳Feel，影下相睇下嘢咁就走人喇。然後我哋就去呢個臥佛寺同埋緬佛寺，去到啱啱出面街位就有位可以泊車，一泊埋去就有人來收錢。其實係可以泊架車入去呢個臥佛寺入面嘅~~~呢個臥佛寺都幾大下，不過D神像就有D泰國Feel，個臥佛係寺入面都幾大個。睇完呢個我哋就對面嘅緬佛寺，呢個緬佛寺我哋都係睇咗面個個緬佛就走人啦~~團友們對於呢D嘢無咩興趣~~~

好啦，之後我哋就要去呢個義香餅家到睇下有無嘢買先，大家都買咗唔少嘅嘢呀~~之後就諗住去食呢個晚餐喇，我哋去咗呢個汕頭街到掃街，架車就咁泊咗係路邊就得喇，不過都要行少少路啦。我哋去食咗呢個炒粿條，又飲呢個杏仁茶同埋呢個四果湯~~~呢個炒粿條都幾好味，杏仁茶同埋呢個四果湯又係幾好味喎。食完呢個我哋又繼續掃街啦，行前咗幾檔，我哋食呢個粿條湯，又係幾好食喎，一碗都係幾蚊雞，真係好抵食。好喇，食完嘢當然係要去食甜品架啦，諗住去食呢個檳榔律馳名潮州煎蕊.紅豆霜，中午個時經過都見到佢有開檔架，點知我哋去到就執緊嘢收檔，嗚嗚~~~無得食呀~~~~

食完嘢我哋就返咗去酒店附近嘅一間肉骨茶店到食肉骨茶，不過呢一間肉骨茶買嘅係叫做綁線肉骨茶，有好多款式，我哋重叫咗一碟芽菜(好懷念怡保嘅芽菜呀)。不過呢一種綁線肉骨茶嘅湯唔係好濃味，我個人比較鍾意呢個重口味多D…所以呢一款綁線肉骨茶我個人覺得係麻麻哋，埋單都唔平架，8 個人食咗MRY$108到，食完就返酒店休息啦，聽日我哋就會離開檳城，去金馬侖高原啦~~~

極樂寺Parking	MYR$ 2.00
極樂寺纜車	MYR$ 40.00
Lunch @ 伍澤秀海南雞飯	MYR$ 64.70
入油	MYR$ 83.00
Pakring @ 臥彿寺	MYR$ 3.00
義香餅店馬蹄酥 & 小豆沙餅	MYR$ 12.00
Dinner @ 汕頭街 四粿湯 & 杏仁茶	MYR$ 23.40
Dinner @ 汕頭街 炒粿條	MYR$ 8.00
Dinner @ 汕頭街 粿條湯	MYR$ 22.50
益香綁絨肉骨茶	MYR$ 107.40
	MYR$ 366.00