~~~活在當夏~~~: 2013 西班牙葡萄牙自駕之旅 (住宿篇)

住宿篇:

今次主力係Book Apartment住，因為可以整早餐同埋晚餐食，不過其實 Apartment係會比住酒店貴20-30%，所以如果你哋係唔會煮嘢食嘅，可以Book酒店就得，不過住Apartment又有個好處，就係可以洗衫，因為有好多 Apartment都會有洗衣機。

呢一次都係係Booking.com到Book晒全部嘅住宿，點解會係全部Booking.com呢，因為Cancel唔洗俾錢，可以隨時改行程都得，當然呢個 Cancel 係會有一定嘅時限啦。我記得我最初個時係用 agoda book住宿多架，不過後來佢哋 Cancel 個時要收返手續費，所以無用佢哋好耐。其實重有 hotel.com 之類嘅網可以book住宿，有時個價重要平過booking.com。不過booking.com個filtering system幾好，我可以揀D我需要嘅住宿類型同埋咩設備，之後佢就會List 晒出來~~

Day 1 Barcelona, Spain

Residencia Salesiana Martí-Codolar

環境 : 似係一間學校宿舍改建而成，間房好細間，因為我哋第一日去到Barcelona都成4點幾，應該無咩行程，呢一間都係渡宿一宵。

設施 : 房入面咩都無，包早餐

Wifi : 都幾強

停車場 : 唯一一間係西班牙有免費泊車嘅住宿

周圍環境 : 最近個地鐵站要行5-10分鐘到，係地鐵站附近有D小形商店同食店。大形超市要行20分鐘先有。

評價 : 如果要住一兩日就真係唔會考慮，因為間房真係咩都無，重有呢一間係包早餐嘅，不過個早餐呢，其實只得麵包同埋橙汁，叫做食得飽。

Price : 每晚EUR$56.1 重要加埋呢個 City Tax (EUR$0.72/p)，即係 Total EUR$57.54

外型似足一間學校

入面淨係放得兩張床同一張枱

廁所反而唔係好細喎

Day 2 Valencia, Spain

Valenciaflats Catedral

環境 : Apartment式住宅，好新，我用 Google搵呢一間住宿個時佢哋重係地盤來。

設施 : 煮食爐具、洗衣機、冷暖空調，真係咩都有咁

Wifi : 強，不過呢就唔穩定

停車場 : 大廈有地下停車場，保安幾好

周圍環境 : 位處於市中心，鄰近景點。附近有超市同幾多食店。

評價 : 呢一間住宿都幾新，重要幾乾淨，設備齊全。如果去呢一區，真係可以考慮住呢一間。

Price : 每晚EUR$49.5 + Parking EUR$15

呢個Apartment起好咗唔係好耐，所以外表好新淨

屋入面咩都有咁濟

睡房同廁所都幾大

Day 3 Granada, Spain

Arte Vida Suites & Spa

環境 : Apartment式住宅，入面嘅裝飾都幾靚，不過睇落去唔係好新

設施 : 煮食爐具、洗衣機

Wifi : 強，不過呢，個晚成晚都用唔到，個負責人話係個網絡供應商有問題，要等到佢第二朝早返來 Reset 個 Router 先用得返。

停車場 : 呢間住宿無自己停車場，個停車場係附近二至三分鐘路程到，如果有大件行李攞返去住宿到就會比較辛苦，因為D路係石春，凹凸不平。個停車場其實係附近一間酒店嘅，保安都幾好。不過呢個停車場入去條路好窄(其實西班牙個個停車場都係咁上下)，揸車出入真係好小心~~

周圍環境 : 位處於市中心，鄰近景點。附近有超市同幾多食店。

評價 : 呢一間住宿都幾好，幾乾淨，設備齊全。佢哋重有Spa做，有興趣可以試下，大家去開呢一區可以考慮住呢一間。

Price : 每晚EUR$65 + Parking EUR$15

住宿唔係好起眼，位處於一條巷仔到

入到房咩都有~~~可以話係一應俱全

Day 4 & 5 Sevilla, Spain

Apartamentos Sevilla

環境 : Apartment式住宅，比較舊式設計。

設施 : 煮食爐具、洗衣機、冷暖空調都有咁。

Wifi : 強，幾穩定

停車場 : 有自己嘅地下停車場，保安幾好，不過入口又係超窄。

周圍環境 : 離市中心都有一段距離，附近有一兩個景點、超市同幾多食店。

評價 : 呢一間住宿都幾舊，不過都幾乾淨，設備齊全。但係呢，當你開晒所有電器，而又同一時間去沖沖的話，有可能會跳電掣，應該係個電力負荷唔到~~因為我哋又同一時間開埋暖氣。好在有帶電筒同搵到個總電掣，如果唔係都幾麻煩~~其中原先有另外一間考慮Book架，不過因為個一間係房係無Wifi嘅，所以最後就Book呢一間。

Price : 每晚EUR$64 + Parking EUR$15

有D似公屋Feel呢….

入面睇落有D似渡假屋 Feel，不過設備都幾齊全，重要幾大下，不過就無咩裝飾

Day 6 & 7 Lisbon, Portugal

The Lisbonaire Apartments

環境 : Apartment式住宅，好新，我用 Google搵呢一間住宿個時佢哋重係地盤來。

設施 : 煮食爐具、洗衣機、冷暖空調，真係咩都有咁

Wifi : 強，好穩定

停車場 : 大廈有地下停車場，保安幾好。但係我發覺其實Apartment對出個條街係可以有得免費泊車嘅，因為D人都係咁揸架車來泊低就走人。

周圍環境 : 位處於市中心，鄰近景點。食店(廣場附近)同超市(Train Statio)要行5分鐘先有。

評價 : 呢一間住宿都幾新，重要幾乾淨，設備齊全。如果去呢一區，真係可以考慮住呢一間。不過負責嘅人其實都幾無耐性同埋好似唔多想答你嘢咁，好似第二日有人泊咗我哋個車位，我哋咪泊埋一邊囉。之後見到佢哋咪同佢哋講聲囉，點知佢竟然話我哋應該將架車泊去第二層有位嘅地方，嘩~~大佬我哋鬼知咩，個位係你哋 assign 俾我哋，當然覺得唔會有人用架啦，如果係咁的話，佢哋應該整張告示出來話人知又或者人哋 Check in 話俾住客知呀嗎 !! 重有就係我哋第一日12:00到到咗，原來係可以入去住個間 Apartment，點知當時係 Reception 個個人話我哋要1500之後先入得，到我哋行完返來另外一個就話其實我哋去到個時已經入得~~~重有就係佢哋D床舖有臭味，都唔知係唔係洗唔乾淨，呢間Apartment睇來真係管理有D問題

Price : 每晚EUR$75 + Parking EUR$15

呢一間Apartment外表似間工廠

入面嘅面積都幾大下

設計都好齊全

Day 8 & 9 Porto, Portugal

bnapartments Rio

環境 : Studio 式住宅，好靚仔，不過就好細間

設施 : 煮食爐具

Wifi : 強，不過電話係用唔到架

停車場 : 泊係街邊兩日，唔洗俾錢，無咩問題

周圍環境 : 係多姆河附近，鄰近景點，附近有超市同幾多食店。

評價 : 呢間住宿無自己停車場，但係可以泊街邊唔洗俾錢，但係個街邊停車場係附近二至三分鐘路程到，如果有大件行李攞返去住宿到就會比較辛苦，因為D路係石春，凹凸不平，重要係去住宿係落斜路。住宿對出其實係可以泊車，不過要係黃昏後同埋朝早八點前要揸走。如果去開呢一區，呢一間真係可以考慮，佢有其他嘅房嘅類型，應該會好過我哋呢一間。

Price : 每晚 EUR$34.25

外表睇唔出係一間租嘅Apartment

入面麻雀雖小，但係五臟俱全，重幾靚仔添喎

呢間嘅廁所比較細，但係廁所位置收Wifi就好強

Day 10 Salamanca, Spain

Exe Hall88 Apartahotel

環境 : Apartment式Hotel，其實同一間酒店無分別，只係有煮食設備加埋入去間房到。

設施 : 煮食爐具，酒店設備

Wifi : 強，好穩定

停車場 : 大廈有地下停車場，保安幾好。不過附近有免費街位可以泊，我哋都係係酒店門口附近搵到一個位，所以唔洗俾錢 !!

周圍環境 : 遠離市中心同景點，附近有超市，酒店到有一食店。

評價 : 呢一間Apartment Hotel都幾好，幾乾淨，如果去呢一區，可以考慮住呢一間。不過去睇景點就要行10-15分鐘先到市中心，我哋就揸架車去咗市中心泊低，然後去睇景點。

Price : 每晚EUR$50

外型根本同間酒店無分別

酒店式公寓

有晒煮食爐具

酒店出面有得臨時泊車，係再後D就係免費嘅泊車位

酒店停車場

Day 11 Toledo, Spain

Hotel Martin

環境 : 酒店一間

設施 : 一般酒店設備

Wifi : 強，幾穩定

停車場 : 酒店對出有錶位，泊一日就要EUR$6，我哋只係泊咗半日，因為佢哋個收費時間每日都係7個鐘(1000-1400, 1700-2000)，其餘嘅都係免費嘅。

周圍環境 : 遠離市中心同景點，附近無嘢食無嘢買，行去市中心要10-15分鐘。

評價 : 呢一間住宿最好就係平，係整個Trip入面最平個一間，幾乾淨，負責人幾好，有問必答，英文重幾好。如果唔嫌遠，呢一間都幾好，揸車嘅真係可以考慮住呢一間。

Price : 每晚EUR$40 + Parking EUR$6(錶位)

酒店式房間，無咩特別

Day 12 Madrid, Spain

Aparthotel G3 Galeon

環境 : Apartment式 Hotel，幾乾淨。

設施 : 煮食爐具、冷暖空調

Wifi : 強，幾穩定

停車場 : 大廈有地下停車場，保安幾好

周圍環境 : 鄰近地鐵站，附近有超市同幾多食店。

評價 : 呢一間Apartment Hotel唔錯，因為Madrid呢一區搵住宿其實都唔容易(我講嘅唔容易係要平、靚、正)，呢一間都幾近個地鐵站，因為Madrid基本上係唔可能揸架車去市中心泊低再去玩，我哋個日入去市中心都塞咗成半個鐘。住宿都幾企理，重要幾乾淨，設備齊全。如果去呢一區，可以考慮住呢一間。

Price : 每晚EUR$70 + Parking EUR$19

呢一間都係酒店式公寓