2013 西班牙葡萄牙自駕之旅 (前言)

西班牙葡萄牙自駕之旅前言:

呢個前言其實都係想講下呢個西葡之旅去之前嘅諗法同準備，係未諗到今次去邊到旅行個時真係無諗過會去西班牙同葡萄牙旅行，點解 ? 因為呢兩個地方出名小偷多，治安又唔好，又係D論壇到睇到有好多人俾人偷嘢，對呢個地方有D恐懼，所以最初都無考慮過去呢兩個地方。

最後，其實好多想去嘅國家都去過，而且歐洲好大部份都去咗，短期內應該唔會翻兜(如果硬係要翻兜嘅我會去克羅地亞)，可以去嘅有瑞士、俄羅斯、北歐、荷比盧同埋西葡呢幾個地方。瑞士D紙水好貴，生活指數都幾高，所以唔諗住。北歐同俄羅斯呢段時候應該會幾凍下，重有就係自駕嘅人唔多，有嘅都係強國人嘅資料，所以唔考慮住。咁到荷比盧同埋西葡，其實開頭係計劃去荷比盧，不過睇下資料，呢幾個地方比起西葡好似無咩嘢睇。最後，就決定去西葡自駕，因為西葡都幾適合自駕遊。

6月頭已經開始睇緊D機票(荷比盧同埋西葡，個時都重諗緊可能會去荷比盧)，諗住早D睇住可能會有荀嘢執，呀~~點知D機票越來越貴，係7月中就決定買機票啦，因為個價真係一個星期貴過一個星期，雖然有可能係航空公司嘅技倆(傳聞佢哋會留咗D Cookies係你部電腦到，等你每次去睇佢哋個Website時個價會多過你上一次睇個個)。買機票呢到又曾經Plan個幾個方案，西班牙入葡萄牙走，葡萄牙入西班牙走，巴塞隆納入馬德里走之類，票價唔係貴好多，不過係租車個到個成本就貴咗，因為多咗一個One Way Rental Charge，計落無著數，況且會有D地方去唔到，要去的話就真係要兜過去，最後都係邊到入邊到走。

之後就Plan條路線，走法係兜一個圈，不過可以分上下兩條路線行，一個就係向西行到葡萄牙然後兜返去西班牙南部再返到巴塞隆納。另外一個就係向南行先再到葡萄牙然後再兜返去巴塞隆納。最終都係向南行先，最主要係住宿個方面，向南行先選擇會多D。之後就Book 車 Book住宿。期間睇D論壇，都幾擔心個治安問題，因為真係又幾多人瀨嘢。因為呢個西葡之旅都添置咗一D隨身用品，當然係用來放錢同埋証件用啦。又買咗幾把鎖俾個背囊用，真係幾誇張~~

到Book住宿個時發覺佢哋全部都無包停車場，要另外俾錢，係西班牙同葡萄牙都係要另外俾停車場錢~~重要個個都係十幾歐泊一晚，但係你真係無得諗咁多，因為係租車，泊街邊有咩事真係唔知點算 !! 所以最後停車場都當係住宿費嘅開支，咁樣會好睇D~~

跟住租車，開頭睇到都幾多款可以揀，但係唔知係唔係因為個邊唔多自動波，有好多車款都好快無咗，重有就係我又唔敢租D靚車喎，係開頭搵租車公司時，見到有架寶馬121i，好想租架，不過因為去呢兩個地方，所以無落到 Order ，同埋呢架車個租車價又唔係貴喎，HK$5000都唔洗。不過最後呢架車係個List到都無再出現過…搵咗幾間租車公司，Quote咗無數次咁多價。係Quote價期間發覺原來係西班牙租車，有好多租車公司都係要你預先買定一缸油，到還車時就唔需要再入滿缸油。睇落好似幾so，不過我睇返D客仔嘅 Feedback 係話，佢哋買個缸油嘅油價係會俾出面油站買嘅貴，好唔抵。

重有其實諗深一層，佢哋都幾識賺錢，因為其實你還車個時好難會用到盡，咁租車公司又用埋用淨嘅油再加滿又俾另外一個客用，重要買貴D，都幾好賺，所以我又要搵D係 Full to Full 嘅租車公司。最後都搵到一間中介公司，呢D中介公司唔知點解個價會平過租車公司個個價，重要係你去返個個租車公司個網，你係會搵唔到你租個架車款，真係好神奇~~~

上面三樣嘢攪掂基本上都可以出發去旅行，不過點都要搵下D景點架，講真~~我個人對於歷史真係無咩興趣，再加上去咗好多歐洲國家旅行。發覺佢哋每一個城市都係個一款模式，就係廣場、教堂、皇宮、修道院~~係搵資料個時其實都睇過下每一個景點嘅特色，然後先加入去個行程到。不過對於我呢D過目即忘嘅我來講，到咗去到個時完全唔係好記得呢個景點有咩歷史…再加上西班牙基本上所有嘅教堂、皇宮、修道院都係收入場費嘅，我呢D著重外表嘅人，又點會俾錢入去睇呀，好多景點都係係外面影相就算，不過大型嘅景點都會入場嘅!!重有就係呢一次西葡之旅真係行到金金哋，因為D景點其實大部份都係係市中心，基本上行唔可能用車去睇，架車放咗係住宿到就係去睇景點。搭公交又唔得，因為佢每一個景點距離又唔係好遠喎，所以基本上我哋係行足十幾日架，重要行到腳指起水泡添呀…

今次其實想用自駕者個角度去寫，因為去到每一區都會留意到泊車同埋揸車嘅嘢，盡量係呢一方面寫多D資料，因為我搵呢一次自駕之旅D資料個時睇過好多Blog，佢哋都無點寫到關於自駕呢一方面嘅資料。