2013 西班牙葡萄牙自駕之旅 (自駕設備篇、駕駛 Tips 及 治安篇 )

自駕設備篇:

講開租車D嘢，不如就講埋D裝備啦。除咗係日本同台灣 (要租過某指定日數) 租車會有埋 GPS附送外，基本上好多歐洲國家都係要另外加錢再租返一個 GPS ，收費通常都係十幾歐一日。好似我咁，租成十幾日，計下條數，埋單都要成千幾兩千蚊港幣。所以係幾年前，我自己已經買咗一部 GPS ，部 GPS係係深水"土步"鴨寮街到買嘅，買咗好似HK$600。其實計返條數係抵買架，因為一定平過租。不過問題係要自己去 Update 返D 地圖。不過聽D網友講，家下新買個D已經係可以駁上網Update。

重有一樣嘢就係，呢D GPS 其實都係源自強國，我係深圳嘅華強北路都見到好多同款嘅 GPS 出現，價錢平過香港，如果你哋係有上開去深圳的話，不妨去華強北路買電子嘢嘅商場到睇睇，可能會有意外嘅收穫 !!

泊車:

係西班牙泊車都幾貴下，特別係係Madrid同埋Barcelona，所以基本上呢兩個地方唔好諗住揸車出去，況且佢哋嘅 Metro 都幾完善，所以搭 Metro 會好D。今次係呢兩個地方我哋都係泊咗架車係住宿個到，然後出去睇嘢。因為係網上面見到有人講係呢兩個地方要搵位泊車其實都幾難(我講嘅街邊錶位)，重有應該泊停車場會幾貴。重有街邊D錶位，記得入夠錢，因為我成日見到有人係到抄牌。個D人著住螢光衣好容易見到，佢哋真係好勤力，我成日都見到佢哋。

又講下其他地方嘅泊車嘢先 :

Valencia, Spain

呢到雖然我哋都係泊係住宿到，但係留意到其實都幾多停車場，泊車應該幾方便。

Granada, Spain

我哋都係泊係住宿然後出去睇嘢，但係停車場周街都係，係主要景點都有停車場。

Cordoba, Spain

呢個我哋都係泊停車場，收費唔係好貴，我哋泊個個係每15分鐘計算，泊咗個幾鐘都係幾歐~~其實街邊都有D位，不過睇你好唔好彩有位，一般泊街都係eur$0.8-1/h

Sevilla, Spain

呢到我諗應該要泊係住宿到啦，因為係街到都唔多見有停車場，錶位都唔多覺有。不過可能係外圍個到有都唔定!!

Lisbon, Portugal

我哋基本上係Book咗停車場，但係我見到有好多人都係泊係街到就得。好似我哋住宿個條街，D人泊低架車就行咗去，我諗應該可以免費泊車，同埋我係我哋住個間Apartment個到有人留言話有免費位泊，我諗應該都係指呢D~~

Porto, Portugal

呢到我哋都係泊街，唔洗俾錢，非常安全 !! GPS Location : 41.14336,-8.618207，呢到附近都係可以泊街嘅~~

Salamanca, Spain

呢到我哋間住宿係係城出面，基本上又係可以泊街唔洗俾錢。不過我哋都有揸車去市中心睇嘢，錶位泊每個鐘收EUR$0.8，重有就係佢哋係 10:00-14:00 同 16:00-20:00 先收錢，你可以入8個鐘就可以泊到聽日10:00先再入~~

Segovia, Spain

呢到我哋泊錶位(GPS : 40.942911,-4.118111)，係羅馬水道附近，我哋EUR$1.4泊兩個鐘，好容易搵到位，09:30-14:00 同 16:30-20:00 先收錢~~

Consuegra, Spain

呢到去睇風車，係個山上面任泊 (GPS : 39.452569,-3.607813)

Toledo, Spain

呢到我哋就泊係住宿出面嘅錶位(GPS : 39.864409,-4.022408)，呢到都係 EUR$0.8/hour，又係10:00-14:00 同 16:00-20:00先收錢。城入面都有D錶位，停車場就唔多覺有，不過應該都有嘅…

Madrid, Spain

大城市，泊車應該都幾大問題，我哋個日淨係入到去都塞咗半個鐘。我哋都係將架車泊咗係住宿，然後出搭Metro出去玩。都有見到有錶位，不過價錢唔知係唔係都係 EUR$0.8/hour呢，停車場都有唔少，不過應該唔平。

Zaragoza, Spain

呢到我哋泊係酒店入面，市中心唔多覺有停車場同埋錶位，外圍嘅反而有錶位。

Barcelona, Spain

大城市，泊車應該都幾大問題，我哋個日淨係入到去都塞咗半個鐘。我哋都係將架車泊咗係住宿，然後出搭Metro出去玩。都有見到有錶位，不過價錢唔知係唔係都係 EUR$0.8/hour呢，停車場都有唔少，不過應該唔平。

就係入呢一種錶，係西班牙好多地方都會見到

 不過呢一種係唔會找錢嘅，所以要用的話就自備散銀

 上面會寫咗邊一段時間要收錢，邊一段時間係免費

駕駛 Tips :

係西班牙，基本上你一駛入市中心就好大機會會行石春路，重有D路好多都係One Way，路都幾窄下，重要成日都改道，所以要留意路牌。重有就係停車場，入去嘅路好多都好窄，要慢慢揸，因為我見D牆好多都簽晒名(即係花晒)。

係葡萄牙，其實D路面情況同西班牙差不多，又係D窄嘅石春路，不過因為葡萄牙地形問題，好多都係起係山到咁，所以好多斜路~~

重有一樣嘢都要講，就係係呢兩個地方，有行人冀圖或意圖要過路你都要停車俾佢哋過馬路，因為我做行人個時，就算我離過馬路嘅地方好遠，所有嘅司機都會停車等你過路。呢樣嘢，我諗香港嘅司機真係要多多學習啦，因為其實我覺得香港嘅司機係唔會讓路俾行人，係西班牙同葡萄牙我深深體會到佢嘅揸車嘅美德。

治安篇:

係未去呢個西班牙同葡萄牙個時，我係幾個討論區到都見都有人講俾人係西班牙或者葡萄牙偷嘢，重有夜晚就唔好去舊區，因為D治安好差。幸運哋我哋兩個今次無咩事件發生過，亦都無見到治安好差，可能我哋入夜後無出去睇嘢嘅原因呱。出發之前，我重買咗個斜孭袋，諗住行街個時孭係前面會穩陣D，不過最後我都無用過，不過我都買咗幾把鎖俾個背囊用。其實西班牙同葡萄牙嘅治安都Ok，凡事小心D應該唔會有咩事件發生，情況未係網上面講到咁差。同埋可能真係夜晚會差D呱，呢一個我哋就証實唔到，因為我哋都係試過係 Zaragoza 夜晚個時出去影過夜景，但係又無咩特別嘢喎。

注意事項:

呢個唔係講咩治安問題，係~~唔知點解係西班牙周地都係狗屎或者狗屎跡，大家行路個時真係要小心~~