2013 大鵬所城東部華僑城三日兩夜之旅 Day 1 (1)

17~19/5/2013

大鵬所城東部華僑城三日兩夜之旅

 

今次襯呢個短短嘅3日假期，同屋企人一齊去咗呢個深圳嘅大鵬區同埋東部華僑城玩咗三日兩夜。其實呢個大鵬我係今年一月個時已經同朋友去咗，不過就無寫到啫，我諗寫完呢個我會再補返之前個個~~

 

17/5/2013 Day 1

 

香港 > 深圳 > 深圳龍崗大鵬較場尾 > MoMo House > 鵬城飯館 > 大鵬古城

 

上午10:15 約咗班親戚係深圳口岸餐廳到集合，係之前就係上水火車站(其實家下已經唔係叫火車站，已經叫咗做鐵路站啦~~~) 附近食返個美味嘅早餐先。

嘩
!! 今日其實都幾多人搭車返羅湖，可能有三日假期嘅關係，上車都好迫下。去到深圳口岸餐廳到未夠10:15，所有親戚們都已經到齊，咁就叫佢哋去廁所方便一下先啦，因為都有成個幾鐘車程。

原先我就計劃大家一齊搭跨境巴士去到大鵬然後就轉公車入去民宿個到嘅，因為我上次都係搭一間叫環島嘅跨境去到大鵬，會係粉嶺或者係九龍塘上車，我係粉嶺上車要HK$60。不過因為今次有老又有嫩，經民宿老闆問價包車由深圳去到民宿18個人都係RMB$500 ，除返都係28蚊人仔一個人，所以多人去包車都幾著數。其實包車個到，我原先淨係問佢有無車由民宿去到東部華僑城個到，佢就答無嘅，就建議我哋包車去，不過我就搵到由民宿去東部華僑城到都有公車，但係就無直接車，要轉兩程車先去到，所以最後就包車來回民宿同東部華僑城啦，盛惠 RMB$600 。之後就順便問埋由深圳來回民宿又幾多錢，每程盛惠 RMB$500，價錢都可以接受，不過都係因為多人除返開先得啫~~

 

我哋攪下攪下，本來諗住係10:30出發，遲咗少少先出發。本來我哋原先有18個人去架，不過其中一個人因為病咗去唔到，所以最後得16個人出發。民宿老闆建議我哋包兩架車，因為佢話一架車會貴好多，去到見到兩架車，其中一架係無冷氣重要D位唔係幾好座，好在今日唔係好熱，如果唔係都幾辛苦。座包車去都幾快，唔洗一個鐘就去到，先前座跨境要成兩個幾鐘先到架~~

 

呢間鵬城飯館都幾大，我哋去到個時都差不多成兩點，叫咗幾個餸，又試下個雞同埋鴨。個雞都可以，但係個鴨就真係唔係好得，因為好硬，先前試過個間D鴨肉好淋好好食架~~不過佢哋個土豆蓮藕絲又幾好食喎。我哋諗住食完就試下佢哋個甜品，點知佢哋話甜品師傅14:30就收咗工，所以無得食~~~