2009 日本東北之旅 Day 13

2009 日本東北自駕遊 Day 13

日期 : 5.11.2009  星期三

行程 : ウェスパ椿山  > はまなす展望台 > 入道崎 > Lunch@かっぱ寿司男鹿店 > 秋田城跡‎ > セリオン秋田ポートタワー‎(秋田觀光塔) > 角館の武家屋敷 > ‎鶴の湯温泉

‎ > ホテル湖心亭 > Dinner@ホテル湖心亭

總行程里數 : 275 公里 – 大約 8 小時 4 分鐘

檢視較大的地圖



今日我哋就要繼續向南下啦，因為去到都差不多去到旅程嘅第13日喇，一早就去食早餐，因為尋晚食個Ｄ係Set嘅早餐諗住今朝個早餐都係會食Ｄ簡單嘅Set嘅早餐添，點知原來係自助形式嘅早餐喎，款式都幾多選擇呀，有點兒驚喜，味精都唔錯添啊 !!

食完早餐我哋就係酒店入面揸架車周圍行下，因為尋日落大雨最終咩地方都無點睇過，原來呢間酒店都唔係好大，住嘅房數都唔係有好多，睇完我哋就開始今日嘅旅程啦。

今日我哋第一個要去嘅地方就係能代市，去到呢到基本上係無咩嘢睇，我哋去睇咗一個はまなす展望台之後就走人喇。

順接住嘅就係去男鹿市，沿路都幾好行，好行過東岸個邊，男鹿市我哋係要去入道崎，呢個位於男鹿半島嘅北邊，應該可以話係日本東北西岸最北嘅地方，去到天氣又幾好萵，所以我哋都影咗唔少影，呢個位置應該係旅遊景點，因為有好多買手信嘅店蒲係到 !! 係呢到我哋可以睇係海，望下海鷗同埋Ｄ鷹，不過呢到都幾大風架。

之後我哋就向秋田出發，係去嘅途中我哋見到有間壽司店喎，原來係河童壽司店，我哋當然即刻泊低架車入去食返幾件先啦!重有就係係呢段時間都食係94円一碟添呀，真係唔食都對唔住自己啦，呢到最抵食就係Ｄ帶子，又新鮮又甜~~~食飽飽我哋就繼續去秋田啦，唔知會唔會見到秋田太嘅呢 ??

基本上秋田市得個千代公園，但係公園我哋去咗好多個啦喎，所以我哋就去秋田城跡‎，但係無嘢睇嘅 !! 之後我哋就去咗セリオン秋田ポートタワー‎(秋田觀光塔)，參觀呢個塔係免費嘅，個塔有100m咁高架，係到可以睇到秋田市嘅環境，重可以睇日落，不過我哋等唔到咁耐喎!!

睇完我哋就順道去睇下角館の武家屋敷，去到見到有好多旅行團係到，重見到有香港嘅東X遊嘅團係到添啊~~~係呢到泊車要俾錢，我哋當然係要周圍兜下睇下有無Ｄ地方係唔洗俾前嘅先啦，好在最後我哋都搵到個免費位。泊好車就行去參觀下啦，首先我哋當然係睇Ｄ唔洗俾錢嘅先啦，睇咗一兩間，點知就落好大雨喎，見佢好多間其實都係差不多，所以我哋就決定走人啦...之後我哋就去田沢湖嘅一Ｄ景點睇下啦，點知去到都重係落好大雨，咁我哋唯有繼續向我哋今晚個旅館出發啦。

係我哋今晚投宿嘅旅館附近就係田沢湖好出名嘅乳湯溫泉區啦，我哋到咗田沢湖就搵咗我哋間旅館先，間旅館外表都幾古色古香下~~~之後我哋就去乳湯溫泉區嘅鶴の湯温泉到睇下究竟乳湯溫泉有幾乳湯啦。嘩~~~原來入去條路都幾難行，行咗一條好嘅路之後就要行咗一段幾難行嘅山路，呢段路行咗我哋成半個鐘，入到去呢個鶴の湯温泉個時成個天都黑晒，出面重要係好凍又落緊微微雨喎~~~~我哋落車行咗一陣，間湯旅唔係好大間，但係就幾有Feel，因為係正山邊，我哋睇咗一陣就即刻上返車走人啊，重有就係呢間湯旅如果天氣唔好條路其實都幾危險~~

之後就沿路出返去返酒店啦，係返酒店之前又去打滿油缸先，我哋去到酒店個時好似無咩人係到咁，唔通成間酒店得我哋一間房有客人住。入到去呢間酒店，得一個人幫我哋Check-in，之後就有個年紀應該都唔細嘅日本女人話幫我哋攞行李去我哋間房喎 ! 嘩~~我哋件行李好重個喎，佢邊到攞到呀，所以我都係自己攞返上去算數。我哋去到酒店個時都成五點幾，睇下呢樣攪下個樣咁，呢間酒店應該係幾耐歷史下，設備叫做齊全啦，電視機同埋電話都係Ｄ八十年代嘅產品，瞓他他咪，所以應該營運咗好耐，所以呢一晚都係無得上網嘅。我哋係入面著Ｄ衫影下相，攪攪下就差不多六點啦，我哋呢次又係一泊二食，附近應該都有Ｄ嘢食嘅，不過費時周圍去搵啦，重有包埋食都唔係好貴，所以Book個時就Book咗呢個啦。係未去食晚餐之前我哋就周圍睇下間酒店，真係無咩特別嘅設備，有個溫泉囉。

呢個晚餐我哋都係無咩期望，咦~~~點解又係個個話幫我哋搬行李個個女人嘅 ?? 大堂又係佢!廚師又係佢~~~但係就係咁又覺得幾好喎，應該係傳統嘅日本料理晚餐，有Ｄ魚生重有天婦羅，真係唔錯 !! 最攪鬼嘅就係有一部好古舊嘅電視機，係要扭來教台個隻電視機，重要係重用得個下先至勁，不過要睇就要入錢先有得睇喎~~~~

我哋食完就上房到Hea下，上到房已經有人幫我哋舖好晒Ｄ床舖啦，應該係襯我哋去食晚餐個時幫我哋整!!到差不多時間我哋就去浸下溫泉先，又係包咗場，得我哋用~~~浸完就返去休息，天氣預報話聽日天氣晴朗呀...好嘢....

連住兩晚特別酒店，雖然幾有風味，但係個人都係鍾意Ｄ商務酒店多Ｄ!!


ウェスパ椿山

間酒店入面都幾多嘢睇，佢自己有得搭車 上山頂都睇嘢架

入面Ｄ擺設都幾.....幾特別

呢到就係我哋住個到啦...

有個甲蟲館

はまなす展望台

無咩特別~~~

去男鹿半島入道崎途經嘅一個地方，都幾靚 !!

入道崎

呢到都好大風架

嘻嘻...我哋最鍾意食嘅壽司呀...

帶子壽司好好食

呢個地方我都唔記得係邊到，係途經....個兩個公仔係男鹿呢一區會成日見到

セリオン秋田ポートタワー‎(秋田觀光塔)

無料...正...

有100m咁高架

秋田市

角館の武家屋敷

呢到都幾多人參觀，但係可惜天氣唔好

鶴の湯温泉

依山而起....唔係有好多間

今晚我哋住古色古香嘅酒店

溫泉

男湯~~~~

是日豐富晚餐

Ｄ食物都幾精緻

有少少魚生食

炸天婦羅

睇下成枱都係嘢食

呢部電視機真係經典啦...重要係入錢先有得睇個隻喎 !!

勁就係呢部電視機係重可以用得架

有湯麵食

.

今晚我哋瞓他他咪