~~~活在當夏~~~: 2018 波蘭．波羅的海三小國自駕之旅 Day 19 3-4-2018 Tuesday (Kraków, Poland)

2018/06/16

2018 波蘭．波羅的海三小國自駕之旅 Day 19 3-4-2018 Tuesday (Kraków, Poland)

Exclusive Apartments > Galeria Krakowska Shopping Mall >紡織會館 Sukiennice > Lunch@AsiaHung@ Galeria Krakowska Shopping Mall Food Court > Auschwitz - Birkenau Memorial > Dinner@Dong A > Exclusive Apartments

Auschwitz - Birkenau Memorial 奧斯威辛－伯肯諾納粹集中營博物館 (Parking: 50.028361, 19.200085)

今日我哋主要嘅景點就係呢個奧斯威辛－伯肯諾納粹集中營博物館(集中營)，不過我哋就Book咗1720個一段時段去參觀，之前嘅時間我哋可以周圍睇下嘢。

今日早餐我哋就食埋帶來嘅嘢食，所以就食誠實豆沙包。今日復活節已經完啦，即係應該啲食店同埋啲店舖會開返!! 重有又會返去廣場到睇返啲之前無開嘅景點，不過應該得紡織會館 Sukiennice未開晒啫，重有座教堂我哋都未入去睇過。

食完早餐，我哋就出發喇，去咗附近個大型商場Galeria Krakowska Shopping Mall到睇下嘢先，買咗少少嘢。呢個商場最頂個到有個Food Court，入面都幾多嘢選擇。

睇完我哋就去市廣場到睇下呢個紡織會館 Sukiennice同主教座堂，呢個紡織會館 Sukiennice入面主要都係買啲裝飾嘢，所以我哋睇咗一陣就走人。個個Easter Market今朝就無開檔喇，不過唔知下午會唔會開。跟住我哋就入去主教座堂入面影下相，然後就返去個大型商場到食Lunch。

我哋Lunch又係食返個間係車站到有分店嘅AsiaHung，呢一間食店啲嘢真係幾好食又夠大碟喎~~~我哋重去超市到買咗支汽水。

食完嘢，我哋就返咗去Apartment到休息下，大概3點我哋就出發去集中營，Apartment去要個幾鐘到。

Miejsce Pamięci i Muzeum Auschwitz-Birkenau 奧斯威辛集中營嘅開放時間視乎季節而定，詳情可參考奧斯威辛集中營官方網站。另外，集中營係免費參觀，但係一般遊客都會參加guided tour跟隨講解員參觀，體驗這一段駭人的歷史(所以我哋就唔Join，不過其實我哋Book個時都無晒位)。一般guided tour的費用為 PLN$50，特價飛就 PLN$45，另外係旺季某啲時段會強制所有遊客參加guided tour（大部份都係啲好嘅時間，所以自己去睇嘅時間一係好早，一係就好遲，最新嘅資料請睇官網）。去參觀集中營嘅人其實都幾多，所以建議預先係網上預購門票，或在網上平台訂購連交通接送的嚮導團。

由Apartment 去要行幾段收費道路，重要幾塞車添，好在我哋早咗出門。去到搵埋停車場大概1630到，呢到無咩指示，我哋都係向住啲人群去嘅地方到去，見到有個地方寫住Museum Entrance(第一營)就去排隊，同埋又未到預約時間，都係諗住搏一搏可以早啲入去睇。我哋諗應該係得一個入口呱，入去參觀之前要過安檢，重有就係背囊都有Size限制，所以我哋就將佢放返上車到。去呢個集中營之前睇咗少少入面嘅資料，大概知個集中營係咩用途。好多人都係懷住一種沉重嘅心情去睇，呢個第一營有幾個營房其實都幾陰涼，有一個又放咗啲人著過嘅衫係到，係成件衫打直咁放係到，好似有人著住咁企係到，第一眼望埋去到俾佢嚇一跳。重有啲鞋、頭髮同埋眼鏡，睇到都覺得唔舒服，我見有啲人睇完雙眼紅晒甚至有人喊咗。戰爭真係一件非常之殘酷嘅事，希望係將來唔會再有發生。我哋睇完第一營呢一邊都已經接近6點，所以係睇唔到第二營個一邊，因為今日個營嘅參觀時間係去到1800，而係1800之前入咗去嘅，可以睇多90分鐘。不過入咗黑，人流又少，其實你都唔會想留係呢到。

第二營主要係網上面搵到嘅資料:

Birkenau比克瑙第二營，係1941年尾開始興建，係主要嘅「滅絕營」。當時納粹德國係二戰中勝仗連連，佔據咗好多地區，特地興建呢個二號營以容納同屠殺佔領區內嘅猶太人。第二營選址係波蘭鐵道樞紐Oswiecim旁邊，就係是為咗用鐵道大量運載猶太人到呢到。當時，納粹軍就直接用咗載貨嘅車卡將猶太人運過來，重將車廂嘅窗都封埋，又唔俾水同食物。係入面嘅猶太人，只可以靠自己帶嘅食物同水維生，當中重有唔少嘅人未到集中營就已經係車廂入面餓死又或者渴死。到咗之後就會由納粹軍進行分類，重將無利用的人直接送到毒氣室殺死。因應要容納大量猶太人，比克瑙第二營的屋都係用木材係好短嘅時間內起好，連地基到無。用木起嘅營完成係唔暖嘅，每到冬天就會有大量嘅猶太人凍死。納粹軍係第二營起咗一個更大型嘅的毒氣室同焚化爐，用來屠殺猶太人。德軍戰敗時，重特登放火燒咗個毒氣室以圖摧毀罪證，好在當時天氣寒冷燒唔晒，先至可以將納粹德軍嘅暴行公諸於世。