~~~活在當夏~~~: 2018 波蘭．波羅的海三小國自駕之旅 Day 15 30-3-2018 Friday (Zakopane, Poland)

2018/06/10

2018 波蘭．波羅的海三小國自駕之旅 Day 15 30-3-2018 Friday (Zakopane, Poland)

Wroclaw 弗次瓦夫 > Zakopane 扎科帕內 > Hotel Helios > Morskie Oko > Hotel Helios > Dinner@ Stek Chałupa > Hotel Helios

Morskie Oko

Parking Palenica Białczańska (49.255876, 20.103051)

Morskie Oko 前，需要給五元入場費。遊客可以選擇給三十元坐馬車 (大概二十五分鐘車程)，或是依著 Morskie Oko 的路牌直接走，大概十公里。官方建議步程約2.5小時，我在香港有運動習慣，且熱愛行山，不知道是不是因為自己感冒導致體力不佳，或是那建議時間根本是給戰鬥民族，奮力跟著一起出發的人腳步，最後花了三小時完成。

今日我哋有成差不多成5個鐘嘅車程，所以我哋未到7點就去咗食早餐，佢哋又已經準備好喇喎。呢間酒店嘅早餐都幾多款式，味道都OK。食完我哋就出發，原先我哋諗住會去呢個Wadowice到停一停先去Zakopaneh，不過睇天氣預測話聽日會落雨，天氣唔係幾好。我哋原先計劃聽日會去呢個Morskie Oko，呢一個景點係戶外，所以如果天氣唔好呢就會麻煩啲。我哋見今日都幾好天，所以我哋就決定今日去行呢個Morskie Oko。

去呢個Zakopane都行咗幾段收費道路，全程收咗3次錢。我哋大概12點就到咗酒店，又去咗Checkin先，開頭比咗一間超細嘅連住嘅單人房俾我哋，咁我哋係book咗 double bed room架嗎，咪同佢講我哋係book咗 double bed room，佢答我哋話呢一間房個View靚，所以就比我哋喎~~我哋同佢講我哋唔要View，我哋係要 double bed room。之後又俾咗一間所謂嘅double bed room，但係就由係兩間房連住嘅，因為我哋都趕時間，所以就無再同佢講咁多~~~呢一間房，我哋懷疑係economy double bed room，因為真係比較簡陋啲~~

呢一間酒店唔係好新，重要係無Lift，要搬行李上房。我哋住個間房就真係比較差，同網上面Book嘅好大分別，應該係個間酒店俾咗一間比較平嘅Double bed room俾我哋，有啲唔老實。房嘅廁所最唔得，因為超細，個屎塔係係正個廁所門口，基本上去廁所係閂唔到門。沖涼個個浴屏又漏水，沖完涼就會成個廁所地下都會濕晒。早餐就一般啦，遲咗落去食會無咩款揀來食。酒店有得免費泊車，不過我睇如果泊滿咗應該會係無位泊嘅~~~酒店行去市中心10分鐘內就會行到去。呢一間酒店係全個旅程最差嘅一間~~~

之後就出發去Morskie Oko海洋之眼，我哋大概1點過啲就去到海洋之眼，呢到泊車要收停車場費，盛惠PLN$25，之後去睇呢個海洋之眼又要收PLN$5。我哋諗住上山個一程就係坐馬車上去嘅，點知去到話無晒馬，同埋今日嘅馬車已經係收咗工~~~吓~~~我哋上網睇話好多馬車等住人坐個喎，咁點算呢?行上去要8km喎，最後我哋決定行上去，然後可能有馬車落返來呢~~

其實如果行8km路都無咩問題，因為行去海洋之眼嘅路都叫OK，但係就係因為有成三分二段嘅路都係結咗冰，所以我哋都行得幾辛苦，用咗大概兩個半鐘先行到去海洋之眼，點知隻海洋之眼結咗冰~~團友話如果知結咗冰就唔上來啦~~~不過我上網睇原來有好多人專等行上來睇結咗冰嘅海洋之眼個喎，不過我哋行到無晒力，所以都無咩心機睇~~諗住會有馬車落返去，因為我哋行上去個時都有見都有馬車落去。點知個一架馬路又話今日收工，後來我哋諗返，睇來呢段時間應該係包車上落嘅，所以個架馬車先話收咗工~~

諗住有得坐車返落去點知又係無，咁我哋又要行返落去~~~中間我哋行咗啲捷徑，有一段係成條都係冰路來嘅，都幾危險，跣咗幾次落地~~好在最後我哋都無事，最後我哋用咗2個鐘行返落去，行到我哋無晒力~~我哋諗如果朝早來應該會有馬車坐，因為多啲人係朝早就上去呢個海洋之眼，去到下午，因為無咩人上去，所以連馬車到收晒工。不過如果唔係因為天氣問題，我哋應該會係朝早先會去行嘅~~今日行上去嘅時候都有藍天嘅，有藍天嘅就靚好多，不過去到海洋之眼個時就天都陰晒喇~~~

之後返到去酒店休息咗一陣就出去市中心到食Dinner，搵咗一間網上面啲人話Ok嘅開餐。叫咗一個麵湯，又幾好味，味道有啲似福字麵嘅味精湯，重叫咗一個豬肋骨同埋牛扒加side disk沙律，重叫咗啲Local Beer同埋Apple Cider。今日真係行到好攰，真係攰到雙腳唔係自己咁。聽日我哋就係呢個 Zakopane市內遊，可以輕鬆一啲喇~~~

住:

Name: Hotel Helios (Double Room)

Address: Słoneczna 2A 34-500 Zakopane Poland Phone: +48 18 201 38 08

GPS: 49.29956, 19.9538 (N 049° 17.974, E 19° 57.229)

Price: PLN$292 Parking: Free

早餐幾多款式