2015 荷、比、盧、德、法自駕之旅 (2) 序

序

呢個荷蘭、比利時、盧森堡、德國之旅都係係出發前個幾月先決定，因為呢….唔知去邊到好~~~買機票到係係3月頭買，因為等佢燃油附加費減咗先訂機票會平少少。不過住宿到就無咩平嘢可以揀到，因為可能時間太少，呢個荷、比、盧、德嘅住宿費都幾貴下，比之前去嘅國家貴，好在歐羅跌咗，幫補咗D費用咋，全部都係係 Booking.com到Book嘅。Book車個到，又係Book遲咗，係Confirm Booking 之前見到有平成幾百蚊嘅 Booking 出現過一日，之後就無再出現~~今次都係搵返個間艇仔公司 Economycarrentals 到Book，因為佢又真係平，重要有全保送，都幾好~~~

呢個荷、比、盧、德最後我哋就去埋法國，其實係有一日嘅住宿嘅老闆介紹係近比利時嘅一個法國小鎮幾靚(係咁講 Beautiful…Beautiful…)，我哋咪去兜下咁囉…係最後個幾日荷蘭又同D親戚食飯同飲滿月酒，都幾忙下~~~不過其實如果係無咩時間，去荷、比、盧十日都足夠，因為要睇嘅嘢真係唔係好多(我講緊我哋呢D對異國文化無咩興趣嘅人咋)~~歐洲通常都係市廣場、市政廳、教堂….呢一類嘅嘢，所以睇睇下就會無咩興趣，我哋有好多Plan咗去嘅城鎮都無去，因為真係無咩吸引力。所以其實十日多D到夠玩，至於德國我哋都係見係盧森堡附近所以去睇下啫~~~法國就俾個住宿老闆老點，不過個個鎮應該幾多嘢買，但係我哋朝早未夠十點就到，好多舖頭都未開，所以都無咩睇~~~

重有呢一次頭個一個星期，成個歐洲都好大風，有幾日我哋覺得好似打緊十號風球咁，成個人都可以吹得郁架 !! 重有就係行行下落冰雹、係盧森堡揸揸下車落雪…好在旅程嘅下半部大部份都好好天，所以都幾正。重有就係都唔知點解我哋去旅行個段時間個D景點好多都維修，不過聽D親戚講話歐洲景點嘅建築物係會成日維修，再加上歐洲人嘅工作進度，可以維修好耐~~~基本上係唔關我哋去嘅時間問題，係維修嘅人嘅問題，不過諗深一層，如果唔維修，D古蹟咪好快爛囉…

今次自駕咗18日(加埋搭飛機其實有20日都幾多下)，最唔好行嘅路就係比利時，佢D高速公路可以有好多窿係到都得架，同埋揸車D人無咩禮貌。荷蘭每逢星期六、日就會封路維修，攪到要兜路~~~停車場泊車嘅錢係咁多次最多，我哋已經係揀來去，如果唔係應該會重多D ! 但係估唔到嘅係租屋嘅錢都佔咗成個旅程嘅三成幾…不過可以去旅行其實都真係唔錯，下一個目的地會係邊到呢 ? 會唔會玩返亞洲地區呢?!因為歐洲差不多大部份都去咗…