2014 冰島自駕之旅 Day 3 28/10/2014 (星期二)
Downtown Reykjavik
Apartment > Thingvellir國家公園 > Strokkur (Geysir 間歇泉已不噴水 > Gullfoss 黃金瀑布 > Kerid火山湖 > Hvolsvöllur >
Borg Apartment
今日我哋就會離開 Reykjavik ，首先會去呢個 Golden Circle 到睇附近嘅景點，睇完就會去今晚嘅住宿。尋晚都幾好瞓，可能係搭咗一轉幾長程嘅機都唔定。食完早餐我哋就出發喇，第一樣要做嘅嘢就係去油站到買油咭(N1)。因為係冰島，好多油站都係自助入油嘅，有D直頭係無人係到，得部機係到。其實係可以用信用卡找數，不過冰島係自助情況下用信用卡係要入密碼嘅，而入密碼只需要入4個位 ! 但係香港嘅密碼係6個位嘅，問過香港嘅銀行，係呢種情況下係用唔到嘅，所以就要一定買油咭喇。但係其實如果唔係會去D好偏遠嘅地方，基本上可以係唔洗買嘅，因為最後我係要退咭先得。
到講返今日個行程先，咁我哋第一站就諗住去搵N1油站，但係搵咗兩、三個都係無人嘅。於是就諗住唔買住，諗住直接去景點，遲D先買。就係去Thingvellir國家公園途中，就見到一個好大嘅 N1 油站，咁咪入去睇下囉，又有得買，咁我就買咗 $40,000kr。買咁多都係因為見到好多人都係用咗差不多成$50,000kr嘅油費，咁最後當然係無用到咁多啦。買完就繼續上路去，一路都好順便。
去到Thingvellir國家公園，未落車就感覺到好大風，重有落少少雨添。原來係咁情況下，你會係想快D睇完之後就會走人。我哋係個觀景台到睇下影下相，不過個時係非常之大風，又凍喎~~之後就去咗睇埋個歐美板塊行多一陣就走人喇，因為實在太大風喇…其實入面重有間教堂同埋瀑布，不過間教堂應該閂咗，個瀑布又要再行入D，所以我哋都係唔睇~~~
食返個早餐先
Downtown Reykjavik Apartment
買咗 $40000 油咭，後來係用唔晒嘅
在途中
行行下見到一堆石
去到Thingvellir國家公園，好大風又好凍
歐美版塊
沒有留言:
發佈留言
來到留返句說話先走啦...