~~~活在當夏~~~: 2011 塔斯曼尼亞自駕之旅 (6)(Day 2 27/10/2011)

2011/12/24

2011 塔斯曼尼亞自駕之旅 (6)(Day 2 27/10/2011)

俾完錢就返返去Narrara
Backpackers Hostel到攞返件行李去Hobart Hostel啦，頭先其實都無睇清楚呢一間 Hobart Hostel嘅環境，呢一間個廚房大過Narrara Backpackers Hostel個間，又有洗衣房啦同埋都係有免費Wifi嘅~~但就係無得泊車~~安頓好咗D行李之後，我哋就休息咗一陣，睇真D間房其實都幾有D監獄風雲Feel…經我哋商議後我哋覺得係要送返D嘢俾頭先個女仔先得，於是就送D士多啤梨俾佢喇!!

我哋架車重泊咗係Narrara
Backpackers Hostel門口到，因為我哋都要出去買今晚嘅晚餐，就返去攞車同埋送D士多啤梨俾個女仔，順便問下佢附近有D咩食，同埋附近邊到有超市。開頭佢都唔要D士多啤梨，但係我就係都要送俾佢，佢誠情難卻下就收咗D士多啤梨，重介紹邊到又嘢食同埋邊到有超市…重有就係我問下佢可唔可以泊架車係佢哋到，佢都話無咩問題，不過就要視乎有無位而定~~

問好晒D嘢，我哋就出發去搵Supermarket啦，係個GPS到篤咗大約位置就揸去睇下，間超市離我哋間Hostel其實都係5分鐘車程內到，第一次搵唔到又兜返轉頭，兜返轉頭又唔見喎…再兜多次先見到咋，呢一間超市都幾大間，係Tasmania有兩間大超市，一間係Woolworths，而另外一間就係Coles，今次我哋係去Woolworths~~

我哋入到去視察下有D咩要買，同埋今晚食D咩嘢~~行咗一輪，買咗D嘢食同埋飲料，重有就係呢幾日嘅早餐食嘅嘢啦，而今晚就唔整嘢食住，就買咗一隻烤雞來做晚餐，再加埋先前摘嘅士多啤梨做飯後甜果~~

買完嘢就揸車返去Hostel到啦，其實呢一間Hostel出面係有D錶位，係星期一至六由09:00~18:00係要俾錢嘅，而之後當然係唔洗俾錢啦，重又就係附近有其他錶位但係收費又唔一樣個喎~~~唔理咁多，返到去Hostel門口咁啱又有個位喎，隨後個幾日我哋都係泊係呢一個位，呢個位好似俾我哋專用咁，哈哈~~~