2010 土耳其自駕之旅 (4) Day 2

2010 土耳其自駕之旅 Day 2  22/10/2010


Istanbul > Eceabat >(搭渡海小輪) Canakkale > Anzac Hotel @ Canakkale
搭咗成唔知幾多個鐘飛機，終於都到咗土耳其嘅伊斯坦堡啦。但係班機都係遲咗成半個鐘先到，去到土耳其第一個感覺係~~~咦~~~國際機場都好似幾~~~幾舊下喎 !!

過海關都幾快，之後就去攞行李喇，去攞行李個時見到有得唱錢就唱咗100歐羅嘅里拉先用住先，收咗4%手續費添~~~~唔記得先前有人提過係機場大堂到有間PPT，手續費收2%。

機場入面個 Duty Free

機場大堂

先前Book咗車約咗係當地時間 9:30 攞車，但係我哋搞掂晒Ｄ嘢出埋來都係九點到，個租車公司話會有個人攞住個寫住我個名嘅人接我哋機，然後搞埋Ｄ租車程序，但係我哋一出來~~~咦~~~~無一個人攞住我個名喎....都幾苦惱下 !!

於是我就係機場入面周圍睇下有無一個人攞住我個名啦，又唔見喎...係搵嘅時間我見到原來呢個機場都有唔少嘅租車公司係入面，幾間國際大嘅租車公司好似 Hertz 同 Avis 都有舖頭係到，重有Ｄ土耳其本土嘅租車公司，加加埋埋都有起碼十間~~~

我係到搵嘅時候又有Ｄ人係到兜生意，佢哋問我租咗車未，俾晒錢未，又問幾多錢租幾多日，我話俾佢哋知租幾多日同埋幾錢之後佢哋就係到用土耳其話自己係到講，我諗應該係佢哋基本係做唔到呢個價錢喇~~~係，應該真係做唔到，因為我之後Book車都搵過唔少資料，個兩間出名嘅貴我租呢一間成一倍都有，所以我知佢哋係講呢一樣嘢~~~

之後我繼續搵喇，最後都係搵唔到，咁我無理由又繼續等啦~~~期間去過一間租車公司到問下知唔知呢一間公司係邊，其實我係想佢幫我打個電話搵呢一間公司，點知佢就咁答我呢間公司機場無舖個喎，我話可唔可以幫我打個電話俾佢哋呀，哦~~無反應~~~~

後來我就去到一個機場入面一個寫住Information嘅地方到，想叫入面嘅職員幫我打個電話話俾間租車公司知我哋來咗，係機場到等緊佢~~~但係佢哋只係話我知打電話去 PTT 啦，真係有Ｄ唔係好 Helpful 呀~~~之後我行去PTT到打電話啦，開頭打個 Email 入面個個電話，點知係唔通嘅，問返個PTT個職員先知要打Ｄ地區字頭先搵到~~~好，終於打到啦...但係電話響好耐都無人聽嘅，點解嘅 ? 心諗，唔係放我哋飛機呀~~~家下先租車的話一定好貴個喎 !! 響咗一陣終於有一個人接電話啦，我同佢講我哋到咗機場，係PTT到等佢~~~打完收線諗住走人，點知係PTT入面個職員唔知講咩叫住我喎，原來打電話要俾錢架，重諗住係免費嘅添

跟住就係個 PTT 到等個間租車公司Ｄ人來啦，期間我又去個應該係土耳其旅遊局嘅舖，問個職員攞咗份地圖，正~~~揸車有幅地圖好好多呢~~~

等呀等，等到差不多成九點九，就有個人攞住一張寫住我個名嘅紙行埋來，因為我係電話到同租車公司個職員講咗人著咩色嘅衫所以就好容易咁搵到我啦。之後個租車公司個職員就帶咗我哋去咗個停車場到攞車，架車同我Book個個牌子唔同，不過唔緊要，最主要係要無問題同埋自動波就得，架車原來係落地唔夠四個月，行咗五千幾公里咋~~~即係新車囉 !! 不過就花咗唔少地方啦，重有就係架車係無入滿油個喎，租車個條款又話會入滿油嘅 !? ~~~Check好晒Ｄ嘢就簽嘢同埋俾錢啦，因為今次預咗全程俾Cash，所以租車錢都係俾Cash，但係個個人又無得找錢俾我喎~~~算 (之後就成個旅程入面，好多次俾歐羅Ｄ酒店都係無得找返歐羅俾你，佢哋會計返個Rate然後俾返里拉)

好啦~~~~出發啦.....咦 !! 要出閘 !! 租車公司無講到要我哋自己俾呢個停車場錢個喎~~~好在唱咗Ｄ里拉咋，唔係就停咗係到~~~去咗閘就停埋一邊Set好晒Ｄ嘢先，因為自己帶咗個 GPS 來，都未知得唔得，開個時有點兒緊張，如果唔得的話就要人肉GPS架啦，好在Set好咗第一個位(Eceabat碼頭)就Show咗條路出來，第一次用呢個GPS系統同埋揸呢架車，所以要適應下，所以慢慢揸

一開始揸出馬路個時，嘩~~~Ｄ車好似玩緊首都GOAL咁，一架二架車係我隔離好快咁駛過，所以我一路都Keep住係慢線，因為我都要睇下Ｄ路牌係點樣，揸咗一段時間就適應咗Ｄ啦，因為一路行住一段高速公路。但係行行下去到一個要收錢嘅地方，但係又無人個喎，於是我就衝咗過去啦，但係又無響喎，唔理咁多，繼續前進~~~揸咗大約三個幾鐘之後就出 Highway，今次真係要收錢啦，但係咩都無指示，之後我就行去一個類似係收費中心嘅地方啦。問個人點過去，都唔知佢講咩，之後啱啱有人揸住張好似八達通嘅咭好似來增值咁，佢就指住張咭，好似問我有無呢張咭，當然係無啦~~~跟住個個人就增值，突然佢叫我俾5里拉個個人幫我過閘...

好嘢~~搞掂又可以繼續行程啦，行行下好似經過一個鎮仔咁，又見到有個超市寫住 Burger King 喎，我哋又肚餓於是就駛入去食嘢順便係超市到買Ｄ水同埋一Ｄ蛋糕仔同小小零食啦...

我哋就係呢個商場食係土耳其嘅第一餐喇...

呢個餐真係唔平，計返成港幣差不多五十蚊呢...

食飽行完超市就繼續行程啦，揸多大約個幾鐘到就到咗Eceabat嘅一個碼頭，我哋見到有Ｄ車係到排隊上船於是就跟住車龍排隊啦，上咗船，有Ｄ人上咗去上面個船艙到食嘢同飲嘢，我哋就影下相行兩行就上返車，因為好大風呀~~~架船大約行咗二十分鐘到就到喇。咦!!但係唔係一落船就到市中心嘅咩 ??? (後來睇返原來我哋去咗另外一個碼頭上咗船)，跟住揸咗太約差不多半個鐘就到咗Canakkale嘅市中心喇，但係我哋都搵唔到間酒店喎 !!

途經一間清真寺

排隊上船啦...

我哋就係搭呢一架車喇...

我係到睇緊個GPS資料中，架車係到飄移緊架..

揸咗五個幾鐘車終於由 Istanbul 經 Eceabat 搭船去 Canakkale ，我哋係呢個市中心到兜咗成幾個圈最後先至搵到咋，原來間酒店咁啱係到裝修緊所以我哋到咪睇唔到囉，不過好在佢係個鐘樓附近容易Locate到咋。我哋見到間酒店，但係呢 !? 佢出面無位泊車個喎，我哋就扮問路泊咗係路邊喇，咁啱問正個酒店員工，係呢個時間，有一個好似警察嘅人行過來準備問我哋嘢個時，個酒店員工就幫我哋答咗佢喇，之後個疑似警察人士就走咗喇。我哋就去Check-in，交低架車俾佢哋喇。

之後就係酒店到Hae咗一陣，然後係 Canakkale 行咗一陣同埋去唱錢，嘩~~~呢到個Rate成1.95個喎~~開頭就唱咗EUR$200，後來諗諗下好似唔係好夠，之後我哋又唱多EUR$500，因為入油都要洗一筆幾多嘅錢，不過我哋無即刻唱，係呢到行下先。

係呢到有一隻木馬放咗係碼頭附近，個酒店員工同我講話呢一隻木馬係拍戲個時用過之後就放咗係到啦..

其實個日嘅天氣都有Ｄ陰天架...你哋睇下有幾多雲

重要係好大風添呀~~~睇下我Ｄ頭髮都吹到變咗形喇...

然後我哋就去咗個市中心到搵食喇，睇咗幾間嘢食，都係Doner Kebabi多，價錢都唔係好貴，不過最後我哋揀哋Ｄ好似香港個Ｄ揀餸飯個款食，味道都唔錯，不過份量就少Ｄ，但係麵包就任食喎。食完嘢我哋就去唱錢，然後就返酒店休息啦~~~

呢個係唔知咩 Mealball加埋薯仔，酸酸哋幾好味

呢一個擺明係粥，但係佢哋話係湯

重有一個夾肉包，味道都幾好，不過入面Ｄ料就少Ｄ

同老板影返張相先

呢個鐘樓後面就係我哋住個間酒店啦..