HKG >
Doha > Warsaw
華沙市中心
今日我哋就出發去呢波蘭．波羅的海三小國(立陶宛、拉脫維亞、愛沙尼亞)自駕之旅，但係我哋今日都係要返工架，所以我哋就放工之後就買咗啲嘢返屋企到食完準備出發。今次我哋就係坐呢個Qatar航空公司，因為去波蘭就無直航嘅，不過搭Qatar就唔係最短時間囉，但係就平。如果我哋早少少買機票，可以係3千到尾，又係等咗幾日之後就加咗幾舊水。我哋班機其實係第二日嘅00:25先起飛，所以我哋夜晚10點到到機場就ok喇。
今日機場唔知點解又係有好多人喎，香港人真係幾鍾意去旅行~~~
呢班機啲位都幾舒適，食咗一餐，瞓咗一瞓話咁快就到咗多哈機場喇，臨落機前一個鐘又食多餐，呢次竟然係有粥食喎。多哈機場都唔記得有幾耐之前來過呢個機場到轉過機，個次我哋重要搭Shuttle Bus兜咗好耐先到機場大樓，同埋個時個機場又唔係好大個喎。今次去到呢個機場完全唔同晒，上一次我記得好似又要再過多一次海關，今次就咁直入就得。同埋個機場就大咗好多，呢個機場都係有Wifi嘅，不過呢….就慢到亞媽都唔認得囉，重有啲地方係收到訊號但係其實係上唔到網(似乎上網已經係現今必須嘅一樣嘢)，我之後就已經係個機場嘅 Suggestion到留咗言。今次我哋原先要等大概差不多4個鐘先再起飛，上咗架機唔知點解又再Delay咗成個鐘先起飛。去到華沙準備降落到跑道時突然又再爬升喎，又係上空到兜咗好幾個圈先降落，最後遲咗成個幾鐘先到。
出境同過海關都好順利，我哋首先去唱返少少波蘭幣先，然後就去攞車。啲租車公司全部都集中咗係一個地方到，租車方面都係搵個間之前去歐洲租個間Economy Car
Rentals，經呢一間搵咗Europcar，Book車個時個網就話係31/3之前係波蘭要用雪鏈先可以行車，所以就要租埋，但係去到攞車時又話唔洗，所以最後都係無租到雪鏈嘅，而波羅的海三小國只係要雪軚就可以喇。
搞好晒啲手續，就要自己去停車場到攞車，個停車場就係個機場隔離，過條馬路就到。我哋一出個機場，嘩~~真係咪講笑，好嗱凍~~~今次我哋就係Book Ford嘅 Station Wagon個一個類別，但係呢就比咗架Peugeot 308 diesel 車，呢一款我都未揸過。架車嘅內籠就唔係好寬敞，個車尾箱只係啱啱好放到兩個28吋行李。
Set 好咗啲GPS同 Carcam就出發，華沙機場去市中心半個鐘車程就會到。今晚住嘅係接近市中心嘅住宿，呢間住宿都幾容易搵，泊車就要另外再俾錢。去到住宿都差不多成4點鐘，諗住兩點到到住宿然後出去市中心到行下，點知家下咁遲。呢間住宿嘅Checkin地方係係樓上，咁啱有人係入去，所以我哋先入到去。Checkin過程都好順利，原先諗住今晚住係Studio Room，間房都就唔係好大，但係就要行3層樓梯先到，如果好似我哋有大件行李就真係幾瀨嘢，不過我見佢有其他嘅房，個啲可能係地下都唔定。
之後就換返張上網漫遊咭，上網咭我哋買咗一張3UK 嘅漫遊咭，因為呢一張咭基本上就覆蓋晒我哋所去嘅地方，不過我哋等咗好耐都上到網，開頭重以為瀨咗嘢，就上網搵下啲Setting，試過晒都係梧得，不過最後差不多要成兩個鍾後先用到，我哋啱啱放張咭去部手機到時佢都有個訊息來話入網要一段時間。
之後就出去搵地方食嘢同埋去超市到買啲水同埋啲沖涼鹼液，呢一間住宿附近都有唔少食店，重有一間唔係好大嘅超市，我哋出去之時，個住宿嘅負責人提我哋要買定啲嘢，因為星期日唔係到到有超市開。
我哋今晚就去咗一間叫Restauracja Zapiecek，原來呢一間嘢係華沙都幾出名個喎。我哋就叫咗牛雜湯、豬手同埋德國腸仔，再加地道啤酒同埋檸水。本來想試下啲波蘭餃子，不過就要最少成6粒，我哋食完呢個就唔洗食其他嘢，所以無叫到。呢間餐廳啲嘢食都幾OK，食完我哋就返去住宿休息，因為聽日我哋就會直上立陶宛，車程都成6個鍾，所以諗住早啲出發。之前其實想係中間位置停一停順便睇下嘢同埋唔洗揸咁耐車，但係原來中間係無嘢睇，所以就直上去立陶宛。
住:
Name:
SleepWell Apartments Ordynacka (Studio)
Address:
ul. Ordynacka 14 Sródmiescie 00-358 Warsaw Poland Phone: +48 600 106 724
GPS:
52.23584, 21.01919 (N 052° 14.151, E 21° 1.152)
Price:
PLN$372 Parking:PLN$34
機上面嘅娛樂
食兩個餐都係同一樣嘢
多哈機場
反而由多哈去華沙有粥食喎，都幾驚喜
Brunch
華沙機場租車公司
呢架就係陪伴我哋二十一日嘅戰車啦
華沙重係好凍
第一晚嘅住宿
要行幾層樓先到
間房其實都幾靚架
有生果送
華沙街道
超市
晚餐餐廳
地道啤酒
呢一張其實係想影後面個啤酒器，成個上
豬手
腸仔
夜晚嘅華沙，其實當時好凍
沒有留言:
發佈留言
來到留返句說話先走啦...