2016 日本中部北陸自駕之旅 Day 15 11/11/2016 星期五 (41) 歡樂嘅時光過得特別快，又係時間講拜拜~~~

Day 15 11/11/2016(Friday)

名古屋 >  AEONMALL常滑店 > 中部國際空港 > 香港

AEONMALL常滑店 MC: 371 759 435*65

今日基本上係無咩特別嘅行程，我哋去機場之前會去下呢個AEONMALL常滑店。SuperHotel嘅早餐真係幾得，重有就係佢嘅麵包真係好好食。呢一間SuperHotel真係幾多香港人住，係我住咁多間來講最多嘅!!食完美味嘅早餐，我哋就出發去呢個AEONMALL常滑店。我哋九點幾出發，去到AEONMALL常滑店都成十點半，因為來個一程路都幾塞車。

呢個AEONMALL常滑店原來都幾多嘢行，不過我哋唔係好夠時間，因為12點左右就要去到機場。我哋重要食埋呢個Lunch先~~~早知就早D出發來呢到行耐D啦，係咁短嘅時間團友都買到嘢!!

我哋十二點幾到就到咗機場，然後就還車。還車個陣個女職員問我入滿油未，我當然係答入滿，然後就問我係邊到入，我立時呆了一陣，都未試過有人問呢個問題!?我咪答係機場附近嘅油站囉，佢然後就叫我比張單佢睇下! 嘩~~~Toyota-Rent-A-Car 原來會Check得咁仔細~~~

之後就去咗機場Checkin，我哋兩件行李加埋都係48kg，重有十幾kg可以放嘢，不過其實我哋兩個喼都係無位可以放嘢架啦….

呢個日本中部北陸之旅可以完滿結束，真係要多謝 blog 友 Mandy !! 同埋要多謝下重有寫Blog嘅人，如果唔係今次呢個旅程都唔會咁快Plan好!其實家下真係少咗好多人寫Blog，因為差不多好多人都去咗用面書出Post出相，代替咗呢D Blog。寫一篇Blog文其實都幾花時間，所以其實我今次都係簡簡單單，寫完如果有時間再豐富返個內容(不過都唔知幾時)。

重有呢一次真係天宮造美，幾個大景點都係好天，如果係唔好天，真係差好遠架~~~雖然今次叫做住豪咗，但係其實又唔係多咗好多錢喎，可能無咩洗費，因為呢個日本中部北陸無咩嘢買~~

呢個遊雞終於都襯呢個聖誕假期同新年完成咗，又要計劃下一次嘅旅程啦..

SuperHotel嘅早餐真係幾得

佢嘅麵包都好出色，大家有機會要試下

出發啦...

又係晴朗的一天

但係就好塞車囉

AEONMALL常滑店

係個Food Court到食午餐

呢一個炸蝦天婦羅我見好多人叫

名古屋機場都幾搞鬼，有D忍者係到

拜拜啦...名古屋

HK Express 成日都行李 Delay

呢一張電話咭幾好用，其實佢有30日有效架