2013 馬來西亞榴槤忘返自駕之旅 Day 1 (1)

2013 馬來西亞自駕之旅 Day 1 21/12/2013

HKG > Kuala Lumpur

今日我哋就係搭下午4點鐘機，不過我哋就約早咗係兩點就係機場等，因為驚多人要等好耐先寄到行李。我哋本來係買馬航嘅，不過唔知係唔係因為少人，所以變咗係國泰機。Check in 個時先知道原來呢一班係大聯合嘅機，重有唔知兩間定三間嘅Airline嘅乘客都係變咗呢一班機。Check in 過程都叫順利，但係班機就Delay咗，要遲半個鐘先可以起飛，好在Book車個到預多咗時間啫~~之後就入去喇，有團員重未食Lunch，於是就係離境區到食喇。

呢一班機要搭差不多4個鐘，係機上面又係睇下戲食下嘢咁就到咗吉隆坡，本來可以試下馬航D飛機餐，傳聞話幾好食…不過就無得試啦，因為搭咗國泰~~

我哋差不多成2030先落機，本來諗住快D出境，然後攞車去酒店，點知一入境無耐就見到有幾間電訊公司，係呢一個年代，無咗網絡就會同世界失去聯絡，團友們就紛紛出返張咭用，我哋8個人，就出咗3張，全部都係 Digi。我重有一張係Blog友俾我嘅，個間係 Hotlink，個價錢貴 Digi幾蚊。我哋諗住Share用，所以就無一人出一張啦~~~係呢到都攪咗成半個鍾，之後就去攞車。一出到去就見到個Counter，不過就無人嘅，要去停車場D棟~~嘩~~呢個D棟都要行幾耐下，我諗都搵咗差不多半個鍾，好在我哋係佢收工前搵到咋~~之後就等佢安排攞車啦，我哋今次Book咗架8人車，重可以放到三件大行李加兩件細行李，都幾好。不過架車就滿身傷痕，所以驗車都驗咗好耐~~

之後就Set 好個GPS，然後就出車喇，出到去又要等個GPS搵到D衛星先開工喎~~~好在間酒店都係10分鐘車程就到啦。

到咗酒店，見到位就泊埋去先，之後就去Check in，攪咗一輪就入房，期間有團友話肚餓就買咗D杯麵準備返房整來食。不過呢間酒店D房用嘅嘢有兩三間只係放咗一個人用，重有就係D Room Service就比較差，又要我哋打電話去攞返都幾麻煩，重要等幾耐下~~~等完就食個杯麵先，又幾好食喎..

Concorde Inn Kuala Lumpur International Airport	MYR$ 1,020.01
Digi 電話咭 (@MYR$26)	MYR$ 78.00
杯麵	MYR$ 10.40
Tips	MYR$ 10.00
	MYR$ 1,118.41

飛機餐..越來越無誠意...

好在係佢哋收工前去到~~不過呢一間租車公司都幾難搵

驗車中

出發啦...其實係到等緊個GPS開工

房好一般

好味杯麵