2010/08/11

2009 日本東北之旅 Day 11


2009 日本東北自駕遊 Day 11(驚險的一天)

日期 : 3.11.2009  星期一

行程 : スーパーホテル十和田 > 竜飛崎(風の岬・龍飛崎)(經八甲田山) > 青函トンネル記念館 > Lunch@海峡味処紫陽花 > 津軽半島十三湖 > 亀ヶ岡石器時代遺跡 > Dinner@イオンモールつがる柏AEON MALL FOOD PLAZA > 津軽ラーメン街道 > スーパーホテル弘前



總行程里數 : 252 公里 – 大約 8 小時 0 分鐘




檢視較大的地圖

今朝係SuperHotel食早餐個時見到一班香港人,真係奇怪呢,係呢個十和田湖嘅地方居然撞到香港人,你話香港人係咪真係無處不在呢 ?! 今朝呢間SuperHotel嘅早餐比較簡單,但係都幾好食。今朝一早就係到落雪添呀,攞車個時成架車都鋪滿晒雪,好在早咗D起身啫,今朝第一個景點就係去竜飛崎(風の岬・龍飛崎)喇,呢個景點都幾遠路程架,位置係津輕半島嘅北端...

一上車當然係Set個地點入去個GPS到啦,去呢個竜飛崎個GPS帶我哋經由八甲田山去,驚險嘅旅程就由開始呢一刻開始啦!! 一路行D雪就越落越大,個GPS帶我哋行呢個八甲田山去,其實呢條路尋日都已經行咗幾次,不過今日就有D唔同,因為落咗雪,行行下已經見到路面有積雪,心知有不妙。不過我哋都係繼續行喎,行行下有架車就本來係我哋出面,因為我哋驚跣軚,所以就行得比較慢,跟住架車重想叫我哋行先喎,當然睬佢都傻啦,呢D環境當然唔好行先啦。之後架車行快過我哋行,但係過無耐就見到架車炒埋咗去防撞欄到啦。我哋都無理佢繼續向山路進發喎,其實一路我哋都係向上行緊嘅,一路行都無其他車出現,淨係得我哋一架車行咋。之後行行下就要落斜行,睇個GPS以為係行錯路,咪諗住Brake架車停一停先行囉,點知架車不受控制不停咁跣落去,於是就入後波諗住倒車喇,但係都係無反應一路繼續跣緊去,呢個時間其實都幾驚下。係呢個時間,唔上淨落我哋就決定繼續向跣緊條路進發,但係架車重係不停咁左右跣軚,非常之危險,隨時有炒埋邊嘅可能性,我當時就不停咁踩個Brake,但係都係無反應(後來呢個豐X嘅混燃車話有問題,我咪就係揸呢一款囉,都唔知係唔係因為呢個原因Brake無反應~~~),之後去到一個斜路灣位想再減速但係都係不受控制,重要不停咁轉個軚盤穩定架車,好在當時對面線係無車咋,如果唔係就一定炒埋一堆都似 !! 後來好在都控制都架車,無事咁過咗呢個灣位,真係非常之好彩呀,真係要多謝上天保佑啦 !!

之後我哋一路落山都行得好慢,因為我適應咗個揸法所以都可以控制到架車,不過個人就幾緊張下囉 !! 去到D灣位嘅時候要行低過10km/hr先得重要係低波(Low Gear)行先得,不過個時最驚係架車係呢個環境之下頂唔緊跪低咗就大鍋啦~~重有就係我哋架車係無裝到雪軚,所以行呢D路真係幾危險架 !! 過晒D山路我哋停咗係一個位到影相,個時成個地都係積雪~~~

落返去青森市停咗係一間便利店出面,我哋就定一定神先諗下去唔去呢個竜飛崎先,因為有機會會在行山路,再行多一次我哋唔知有無咁好彩,不過我哋就決定如果個GPS一再指我哋行山路的話我哋就掉頭行第二條平路 !! 當時我落車見到架車四個轆到鋪滿晒雪,唔係雪係冰先啱,所以架車應該無晒抓著力,好容易會跣軚 !! 最後我哋係經由呢個沿海邊嘅路線去呢個竜飛崎,所以一路都幾好行,只係有一段路有D雪,但係因為係平路所以基本上都無咩問題。

去到竜飛崎附近已經可以見到北海道嘅函館,但係去到竜飛崎時就突然之間好大風同大雪喎,成個人都可以吹得起個隻喎,於是我哋落咗車搵個位影完D吹到唔似人形嘅相之後就上返車喇。然後我哋就去咗青函トンネル記念館入面個間海峡味処紫陽花到食埋個Lunch先走。我哋叫咗一個海膽親子丼同一個海鮮拉麵,兩個嘅味道都唔錯,但係個海膽就麻麻哋 !! 食完我哋就出發去津軽半島十三湖,但係行行下就封咗路,唯有行第二條路去啦 ! 去到津軽半島十三湖到都無嘢睇嘅,等我哋重山長水遠咁揸入來添,睇下附近有無嘢睇啦,就見到有個亀ヶ岡石器時代遺跡,還掂都係附近就去睇下啦,入咗D資料入去個GPS到,去到附近淨係見到D民居咩亀ヶ岡石器時代遺跡到唔喎,我哋咪周圍兜下囉,原來個遺跡就係路邊到 !! 呢個遺跡就只係放咗個像係到,有D文字解釋下咁啦~~~係隔離重有個廁所添呀,我哋當然係順便方便埋啦,個廁所都幾環保,係用天然光架...

睇完呢到我哋諗住去津軽ラーメン街道到行下街,途經一個叫イオンモールつがる柏咁我哋咪入去睇下囉,嘩~~原來入面都幾大個喎,又有好多嘢睇添呀 !!  我哋係入面行咗幾間店舖重係入面買咗D衫同埋鞋添呀,而係其中一間到買咗一對毛毛鞋添呀,第一間想買個時個對係要成1900円,但係因為個Size唔啱所以試咗另外一對3000円,試落又幾好喎,所以最後就買咗喇。行行下見到有間買衫褲寫住2000円一件,我哋重以為D羽絨褸係2000円一件添,睇真D原來係每件原價減2000円,減咗價就要10800円一件啦,係香港呢種質素用呢個價錢一定買唔到啦,不過我哋都無即刻買,行下睇下有無其他好嘅再決定,睇晒成個Mall,最後我哋都返轉頭買咗。

係呢個Mall入面重有個Food Plaza添呀,我哋見到差不多時間,就係呢到食埋我哋今日個晚餐啦~~~之後我哋就去咗津軽ラーメン街道EML到行下,原來呢一邊重大D添架,有好多商店同埋食店,係呢一邊係一個幾好行嘅商場,但係D店舖就比較高檔D,所以D嘢都比較貴D!重有就係呢到有個拉麵橫丁,都有唔少嘅麵店係入面。我哋見到行到差不多而且今晚又要洗衫喎,所以行完就返酒店休息,去到酒店差不多成七點 !!

今日真係驚險的一天 !!

今日係落咗雪嘅山路揸車真係有驚無險 !! 一早攞車個時架車已經鋪滿雪啦...




沿路D樹都俾雪覆蓋




路面已經有積雪,但係有車行整咗D軚路出來




行行下落埋雪添,呢個時候我哋重好開心架 !!




睇下得負四度咋




呢個時間已經過咗驚險個一段路,個人都係驚魂未定




去龍飛崎途經一個公園,其實我哋係去幫襯個廁所咋




有好多龍嘅裝飾係呢個龍飛崎到架




呢個為其實好大風架...




風之鄉 <--- 即係好大風啦...




午餐 - 海鮮拉麵同海膽飯,煮熟咗嘅海膽無咁好食




十三湖,都唔知有咩睇




Aeon Mall - 呢到有好多嘢睇假架




晚餐 - 牛肉烏冬同石頭煱飯









ELM Shopping Mall - 好大架...




拉麵橫丁




2010/08/09

2009 日本東北之旅 Day 10


2009 日本東北自駕遊 Day 10

日期 : 2.11.2009  星期日六

行程 : スースーパーホテル青森  > 奧入瀨溪流 > 十和田湖 > 乙女の像 >  Lunch@十和田湖御食事処神田川 > 奧入瀨溪流 > 奥入瀬渓流溫泉鄉足湯浸腳(旧奥入瀬渓流温泉ホテル前) > 八甲田山山麓駅 > 城ヶ倉大橋 > スーパーホテル十和田 > Dinner@ バラ焼きショップふじの ブログ

有用資料

總行程里數 : 187 公里 – 大約 5 小時 38 分鐘





檢視較大的地圖

今日係行程嘅得兩、三個景點,第一個就係奧入瀨溪流,我哋一路揸車入去嘅時候,睇住個溫度一路行一路跌,有D地方重要係有雪添呀,最低嘅溫度試過得零下三度咋 !! 去到奧入瀨落車嘅時候非常之凍,室外溫度得三度,所以要Full Gear上陣,因為太凍嘅關係,我哋要用車代步行呢個奧入瀨溪流喇。我哋一路揸車入去,係每個景點位都有好多車同埋人停咗係到影相,我哋當然係其中一個啦,一路揸車一路影相入去睇呢個奧入瀨溪流。呢個行程嘅金句,如果天氣好的話同埋無咁凍,呢個奧入瀨溪流應該可以睇到一日,其實我都預咗一日嘅時間係呢個景點架。我哋一路入,去到個十田和湖個時,真係唔係好想落車,因為呢個位置真係又大風又凍呀,但係都重有好多人坐船遊湖喎...我哋影完相放低幾兩之後就即刻上車喇 !! 第9日,因為天氣預報話會落雨同埋天氣唔係咁好,所以我哋就取消咗原先計劃去恐山同大間崎嘅行程喇,恐山其實係一個墳場,有日本三大靈場之一之稱號(下北本島觀光、下北半島觀光案內、青森県下北半島の総合案内所),有個比較出名嘅就係地獄谷,不過車程就真係幾遠下,大間崎其實就係日本本島嘅最北面,個到睇日落應該會幾正,同埋其實呢個下北半島都幾多嘢睇架,食海鮮當然又係一流啦....但係如果天氣唔好同埋會落雪的話就會好危險啦,加上淨係去呢兩個景點來回車程差不多成5~6個鐘,比較幾長下,雖然去唔到本州最北嘅地方,但係無所謂啦,同埋無謂係到遊車河呀嗎,重有可以下次先去都得架嗎 !!

然後我哋就去下一個景點就係乙女の像喇,呢個景點附近無得免費泊車喎,因為呢個係一個遊客區呢。我哋當然係要搵下先啦,無咁快會泊入去D有料停車場嘅 !! 最後都係附近一個無咩人嘅位置搵到個位泊低咗架車,之後我哋就行去呢個乙女の像到睇下啦。行入去睇呢個要其中嘅一條路要經過一間神社,重要有一個警告牌寫住"熊出沒注意"添呀~~~呢個景點,我哋去睇嘅時候到無咩人,非常之冷清 !! 影完相都差不多成12點,於是我哋就係附近都搵下嘢食喇,揸架車周圍兜下先。係個乙女の像到搵到一間叫十和田湖御食事処神田川,我哋叫咗個生姜燒飯同埋一個叉燒拉麵,味道都唔錯呀,不過可能係因為出面凍嘅關係呱~~~

之後我哋就去八甲田到諗住坐下吊車睇下呢個八甲田山嘅風景啦,不過一路行就開始落雪,係去呢個景點之前我哋經過一個地方,見到寫住有足湯喎,當然係要入去睇一睇有無得浸下啦。原來呢個足湯係叫奥入瀬渓流溫泉鄉足湯浸腳(旧奥入瀬渓流温泉ホテル前),不過我哋浸嘅時候就一個人都無,附近有一間屋仔好似係D食店來嘅,但係無開,重有一間酒店係到,但係好似係結咗業無做。

我哋浸完腳成個人即刻暖晒,就繼續去呢個八甲田喇,但係去到呢個八甲田山山麓駅嘅時候係咁嘅天氣之下我哋當然係唔會坐吊車啦,係個車站到睇咗一陣,上車睇下本書仔,就去睇附近嘅一個景點啦,呢個景點叫做城ヶ倉大橋,去到嘅時間當然重係到落緊雪啦...所以我哋影完相就即刻上車喇...

原本Plan咗去酸ヶ湯温泉到睇下,但係咁嘅環境同埋要行山路所以我哋就取消咗呢個行程早D返酒店休息同埋去酒店附近行下好過 ~~

去到酒店都未夠四點,所以就周圍到兜下睇下有咩睇啦~~呢個十和田市原來都幾鄉下下個喎,附近完全係無嘢行,同埋唔見有D咩食咁,咁D人究竟食咩嘅呢 ?? 我哋今晚又食咩好呢 ??

兜完一陣,就去酒店Check-in然後就係酒店到Hea咗一陣就出去搵食啦,酒店樓下有一間食店,但係只係食壽司同埋串燒,對面重有間食牛肉丼同埋豬肉丼嘅食店。我哋見時間尚早就周圍行下啦。行行下見到有間好似生活良品嘅10蚊店,就入去睇下,我哋重係入面買咗D嘢添喎,係呢個地方我哋都買到嘢真係勁 !! 之後我哋就去咗酒店對面個間食店都食Dinner啦,呢間食店叫做バラ焼きショップふじの ブログ ,原來係網上面睇到幾出名個喎 !! 我哋亂打亂撞叫咗個豚肉燒同埋一個AS牛肉燒定食,味道真係幾好喎,重要係鐵板燒來架,真係幾正。食完我哋就返酒店啦,因為呢到真係無嘢睇呀....

 

今日好凍,有地方去到零下三度,長期都係三至四度 !  重有落埋雪添呀...

 岩木山展望台




已經凍到有雪啦..




個山頂已經有積雪




負一度呀...






奧入瀨溪流


重有紅葉...




條溪流都幾靚




十和田湖...唔好睇無咩嘢咁,其實好大風架..




觀光船




美味嘅午餐 - 叉燒拉麵




生姜豚肉燒定食









青森名物




繼續睇奧入瀨溪流




行行下見到有得浸腳當然要入去浸下啦...




附近嘅環境都幾靚架,睇下我哋架戰車幾靚仔




行行下得負兩度咋




八甲田山山麓駅入面嘅環境




城ヶ倉大橋,資料話呢度會有紅葉睇,但係呢一刻只有雪睇咋喎..









晚餐....好好味...